Kiơ̆ nơ̆r hơpĭnh, jăl trong ou hơtăih 122km heo, kơ̆l trong tơƀưh hăm trong gre rĕnh Tu-Pơbăh găh Hơlĕch, trong hơtuch tơƀưh hăm Trong glung 14; trong să ăn 4 tong gre kơdou ting ring, gơh kơdou rĕnh 100km lơ̆m 1 jơ, đei trong ăn dơ̆ng kăl. Akŏp kon jên tơmơ̆t jang dang 29.000 ti hlak jên ( tim mă jô̆ hăm kon jên cheh đơ̆ng tŏk iŏk lơ̆m khei ‘năr ming man). Bơ̆ jang hơmet ăn tơmơ̆t jên jang tơchĕng hơlou đei tơlĕch jang hloi đơ̆ng sơnăm 2025 - 2026; iung ming man đơ̆ng sơnăm 2026 păng tơcheng pơm keh đang păng gơ̆h iŏk yua lơ̆m sơnăm 2029. Trong gre rĕng Phú Yên - Dak Lăk ưh khan pơih đei tơdrong rơvơn atŏk tơ iung chơ tơmam drăm đơ̆ng dơnŏk đak dơsĭ đơ̆ng Phú Yên truh hăm rim teh đak lơ̆m Tơring đak kroong Mê Kong, mă oei pơtrŭt kơtang tĕch răt tơmam drăm choh jang sa nhen chehphe, tiu, sâu riêng ... năm tơ̆ rim dêh char tơring tơmăn Nam Trung Bộ.