Kiơ̆ trong jang proh hơmet anih bơ̆jang tơ̆ apŭng păng tơ̆ xăh, hop akŏm hlôi drơ̆ng nơ̆r pơtôch tơdrong jang đơ̆ng 17 đảng bộ tơ̆ apŭng, thĭ xăh, pơlei tơm păng pơjing ‘nao 77 đảng bộ xăh, phường. Gia Lai kŭm tơchơ̆t hơmet ming, kơsô̆ bơngai jang pơgơ̆r khŭl jang anih jang đảng xăh đơ̆ng rŏng proh hơmet.

Mĭnh anih jang đảng xăh gô pơjing 3 anih joăt jang tơgŭm tơdrong jang. Dôm xăh, phường đei anih bơ̆jang chĭnh trĭ tơ̆ apŭng gô pơjing dơ̆ng anih jang chĭnh trĭ găh anih jang đảng. Anih jang Đảng dêh char athei dôm anih jang tơtĕnh tơlĕch jang dôm hơyak pơtăl dơ̆ng, vei sơđơ̆ng dôm đảng bộ xăh, phường ‘nao yak mơ̆t lơ̆m bơ̆jang tơpă đơ̆ng ‘năr 1/7/2025.