‘Mi jur ưh ê tơ̆ tơring sơlam Đắk Nông lăp prăng, 4 ‘nu Công an xăh Quảng Trực, apŭng Tuy Đức lĕch bơ̆ jang hăm đe thơ̆ oei man hnam, tơgŭm ăn 1 unh hnam tơ̆ plei Bu Prăng 1A. Thiếu tá Nguyễn Văn Dũng, Phŏ Công an xăh Quảng Trực, tơroi vă man đang trŏ năr, kơjăp ‘lơ̆ng hăm dôm tŏ hnam tơgŭm ăn kon pơlei, kŭm nhen jang ‘lơ̆ng tơdrong vei lăng sơđơ̆ng tơ̆ tơring, đĭ đăng 31 ‘nu kăn ƀô̆, linh tơ̆ xăh pơlơ̆h băl vang năm bơ̆ jang vang tơgŭm đe man hnam: “Công an xăh pơjao tơdrong jang ăn rim grŭp, drŭh kiơ̆ đe thơ̆ man hnam tơ̆ dôm pơlei đei unh hnam tơnuh, vă jê̆ tơnuh đei xa yoa tơdrong jang sut pơđĭ hnam hiăh hiok. ‘Nhŏng oh nhôn bơ̆ jang kiơ̆ "3 tơdrong kơjăp" đei: Tơnăr kơjăp, kơmŏng kơjăp păng bơbŭng kơjăp vă huei pă hnăt dăh mă hiăh hiok. Găh tơdrong ming man, pơjao khul linh dăr dôm khul jang, ming man păng athei đe sư man mă trŏ ki thuơ̆t.”

Mŏ Thị Thướt, 36 sơnăm, bơngai M’nông tơ̆ plei Bu Prăng 1A, jĭ mĕ hơdrô̆ oei rong 2 ‘nu kon. Klo lôch hơchăng yoa jĭ jăn, 1 ‘nu mŏ adrin jang rong ‘me unh hnam, hăm 2 sao cheh phe păng jang thuê ăn kơ đe tôch pơmat tat. 3 ‘nu mĕ kon oei oăi lơ̆m hnam tơ̆r so sŏch kơ unh hnam yă ƀok pơm ăn, xă tam mă truh 20m², tơnăr hiăh hiok, kem xăng xa đĭ bơih. Brei drou, Thướt jĭ 1 lơ̆m vă jê̆ 10 unh hnam tơ̆ pơlei đei tơgŭm man hnam oei.

Mŏ Thươt akhan, đei tơgŭm hnam oei, mĕkon mŏ tôch hơiă, ƀôh tôch kơ pŭn: “Klo inh lôch hơchăng lơ̆m sơnăm 2023, 1 ‘nu inh athei rong 2 ‘nu kon, tơdrong arih xa tôch pơmat tat, unh hnam tơnuh hlŏh lơ̆m pơlei. Đei Công an tơgŭm man hnam 3 ‘nu mĕ kon nhôn tôch hơiă. Truh âu kơnh tŏk oei tơ̆ hnam ‘nao ưh pă hli ‘mi hnăt, kial tak, ƀruih ƀrăm kiơ bơih. Dang ei inh tôch hơnơ̆ng jơhngâm chă choh jang mir, chă jang ăn kơ đe chă jên rong kon hŏk. Bơnê kơ Anih tơm vei lăng Công an, dôm anih jang kơpal păng tơring.”

Jang kiơ̆ trong jang đơ̆ng Khul kơdră teh đak găh sut pơđĭ hnam hiăh hiok ăn unh hnam tơnuh, vă jê̆ tơnuh păng unh hnam đei kŏng, unh hnam bơngai kon kông, đơ̆ng sơnăm 2024 truh dang ei, Anih tơm vei lăng Công an vang tơgop, krao hơvơn mong akŏm jên man tơgŭm rơbâu tŏ hnam tơ̆ dôm dêh char Tây Nguyên.

Hơdrô̆ tơ̆ Đắk Nông, sơnăm 2025 đei 500 tŏ hnam hăm jên man truh 30 ti, pơjao ăn Công an dêh char bơ̆ jang. Đơ̆ng rŏng kơ iŏk đei jên, Công an Đắk Nông pơjing 5 grŭp jang yoa Khul kơdră chĕp kơ̆l công an dêh char vei lăng, pơjei băl bơ̆ jang 56 măng năr đơ̆ng 12/5 - 30/6 khŏm man đang hnam.

Kiơ̆ Công an dêh char Đắk Nông, mă đơ̆ng khei tơm ming man đei tơlĕch trŏ lơ̆m pơyan ‘mi, tơdrong chă thơ̆ ming man kŭm tôch pơmat tat, rim tơmam vă ming man, mă loi ‘nŏh chuơh tŏk măk păng kơƀăh... Mă lei hăm tơdrong chĕp kơ̆l pơgơ̆r tôch kơjăp đơ̆ng đe kơdră chĕp kơ̆l Đảng, đe ƀok yŏng Công an dêh char, đon jang tơnăp đơ̆ng dôm khul jang, păng tơdrong vang jang tơgŭm đơ̆ng rim anih jang chinh trĭ, đon adrin tôch pơnĕh đơ̆ng khul linh Công an dêh char, lơ̆m noh tơm hlŏh jĭ khul Công an tơ̆ xăh, đơ̆ng rŏng dang 3 giĕng tơlĕch, đĭ đăng 500 tŏ hnam hlôi đei tơlĕch man, hlŏh 100 tŏ hnam đĭ man đang bơih, iŏk đei 30% tơdrong jang.

Đại tá Trần Văn Dũng, Phŏ kơdră Công an dêh char Đắk Nông, roi tơbăt lơ trong jang vă gơ̆h tŏk klăih đơ̆ng dôm tơdrong pơmat tat vă bơ̆jang ming man, khŏm jang đang adrol kơ ‘năr 20/6 âu, hrôih ƀiơ̆ 10 năr: “Tơdrong ưh kơmăh chuơh, nhôn pơjao ăn dôm khul jang, công an dôm xăh krao hơvơn anih tĕch chuơh, dôm anih kôch chuơh vang tơgŭm ưh đei iŏk jên kon. Đe sư băt păng pơm kiơ̆, yoa ‘nâu jĭ tơdrong tơgŭm ăn bơngai tơnuh hin. Khul kơdră chĕp kơ̆l pơtho ăn rim khul công an tơ̆ dôm xăh; vang roi tơƀôh ăn Anih vei lăng kon pơlei dôm xăh krao hơvơn ‘nhŏng oh, rim khul vang jang tơgŭm man hnam ăn dôm unh hnam đei xa yoa. Pơtih gia, mưh đe sư ưh kơmăh bơngai jang vă yuih hnam so, nhôn krao hơvơn ‘nhŏng oh vang tơgŭm ăn; ưh kơmăh bơngai man, nhôn chă rơih đe kăn ƀô̆, linh gơ̆h man năm tơgŭm ăn.”

Dôm tŏ hnam man kơjăp ‘lơ̆ng oei vă man đang ƀât tŏk bŏk pơyan ‘mi Tây Nguyên ưh lăp tơgŭm anih oei xa sơđơ̆ng ‘lơ̆ng ăn dôm unh hnam tơnuh đĕch, mă oei jing tơdrong tơƀôh hơdăh jơhngâm đon “yoa kon pơlei mă pơvih pơvăn” đơ̆ng khul linh Công an. Đơ̆ng trong jang tih đơ̆ng Khul kơdră teh đak truh rim tơdrong jang hơdăh ‘lơ̆ng tôch đei yoa tơ̆ yăn âu đơ̆ng Anih tơm vei lăng Công an păng Công an dêh char Đắk Nông, tơdrong jang sut pơđĭ hnam hiăh hiok hlôi hơnhăk ba jơhngâm đon chơt hơiă, băt ‘mêm băl, tơ̆k hơdăh đon lui lơ̆m 1 tơdrong arioh xa ning mônh kơnh hiôk sơđơ̆ng, ‘lơ̆ng hơiă ƀiơ̆ ăn kon pơlei tơ̆ tơring hơtăih yăih, tơring sơlam. 1 pôm tơblô, 1 pôm hnam ưh lăp man hăm simăng đĕch, mă oei man hăm jơhngâm đon ‘mâm băt, đon jang tơnăp păng đon adrin yak hơdoi hăm kon pơlei rok trong bơ̆ jang sut pơđĭ tơnuh hin, jang xa, oei xa ‘lơ̆ng hơiă.