Hăm jơhngơ̆m đon tơpăt rơhâu, tơbôl păng lui ngeh, 2 kơdră chĕp kơ̆l hlôi roi tơbăt tơdrong mŭk drăm, tơpôl 2 teh đak; hơlen lăng găh dôm hơyak hơtŏk tơiung đơ̆ng tơdrong pơvei 2 pang lơ̆m khei ‘năr âu ki, hơdai hăm pơma dơnuh păng drơ̆ng nơ̆r găh dôm trong jang hơdai tih đơ̆ng 2 teh đak tơ̆ hơnăp kơnh. Kơdră teh đak Lương Cường păng Kơdră tơm teh đak Phalăng drơ̆ng nơ̆r pơtrŭt tĕch mơdro tơmơ̆t jên jang; tơlĕch jang păng iŏk jang jơnei Tơdrong tơchơ̆t mơdro sa hiôk hian Việt Nam - EU. Phalăng gô pơtrŭt vă jăh jang keh đang kĭ ăn tơdrong Tơchơ̆t vei lăng tơgŭm tơmơ̆t jên jang EU - Việt Nam, pơtrŭt Anih jang Châu Âu jăh hŭt lê̆ “the dreng” IUU hăm tơmam ka hơdang Việt Nam păng pơm tơdrong hiôk vă Việt Nam hơtŏk tĕch ka hơdang lơ̆m anih tĕch mơdro Phalăng păng EU.

2 Kơdră chĕp kơ̆l drơ̆ng nơ̆r hơnơ̆ng hơtŏk loi dơ̆ng păng pơtrŭt jang hơdai lơ̆m rim tơdrong jang hơdai joăt joe nhen pơtho pơhrăm, pơgang păng tư pháp kŭm nhen lơ̆m tơdrong jang joh ayŏ - tơmang lăng, choh jang sa păng tơjră hăm tŏ ‘mi kial tơplih. Đơ̆ng rŏng pơma đam, Kơdră teh đak Lương Cường păng Kơdră tơm teh đak Phalăng dơ̆ng lăng lêh pơjao dôm hla ar kăl jang hơdai lơ̆m lơ tơdrong jang khŭl lĭnh, vei sơđơ̆ng, khoa hŏk kơmăy kơmŏk, ŭnh hơyuh hạt nhân, tư pháp, trong nơnăm gre kơdâu, gre păr, choh jang sa păng cham char, pơgang....