Kơsơ̆ năr (23/5), Kơ iĕng Thủ tướng Lê Thành Long bơ̆ jang hăm Hơnih tơm vei lăng Hnam trương pơtho pơhrăm găh trong vă pơjing Tơdrong tơchơ̆t gơh jang kơ khul kơdră chĕp pơgơ̆r tơring lơ̆m tơdrong pơtho pơhrăm kiơ̆ trong khul kơdră tơring ƀar kâp păng trong vă pơjing Tơdrong tơchơ̆t găh pơjao, gơh jang lơ̆m bơ̆ jang teh đak lơ̆m pơtho pơhrăm. Tơ̆ Hop akŏm, rim nơ̆r tơgop đơ̆ng Hơnih tơm, hơnih bơ̆ jang hôn bơnê kơtang dôm tơdrong hơdrin đơ̆ng Hơnih tơm vei lăng hnam trương pơtho pơhrăm, jĭ Hơnih tơm blŭng a pơtruh trong vă pơjing Tơdrong tơchơ̆t ăn Hơnih tơm Tư pháp vă hơlen kĭ tơchơ̆t. Pơma pơtôch hop akŏm, Kơ iĕng Thủ tướng Lê Thành Long athei Hơnih tơm vei lăng Hnam trương pơtho pơhrăm chih jô̆ hơlen mă tôm tong rim tơdrong jang dang ei đei păng tơƀôh hơdăh găh tơdrong gơh jang kơ rim hơnih. Kơ iĕng Thủ tướng jei athei Hơnih tơm vei lăng Hnam trương pơtho pơhrăm kăl chă tơchĕng hơlen dơ̆ng tơdrong gơ̆h jang pơjao ăn tơ̆ tơring. Hăm rim tơdrong jang lơ̆m bơ̆ jang ou, tơring gơ̆h jang kiơ̆ lơ hloh.Kơ iĕng Thủ tướng drơ̆ng mĭnh nơ̆r găh tơdrong pơtruh tơdrong gơh jang đơ̆ng Khul kơdră Teh đak, Thủ tướng teh đak ăn Kơdră chĕp pơgơ̆r Hơnih tơm vei lăng Hnam trương pơtho pơhrăm.