Ăn tơgop nơ̆r tơ̆ hop akŏm lơ̆m khul, Kơdră chĕp pơgơ̆r Kuô̆k hô̆i pơma hơdăh, mĭnh ‘măng dơ̆ng ăn tơgop nơ̆r Trong vă pơjing Tơdrong tơchơ̆t đơ̆ng Kuô̆k hô̆i hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm Teh đak sơnăm 2013 đei jang kiơ̆ 8 lơ̆m 120 apăng hăm 2 tơchơ̆t đei ƀơm truh Mặt trận Tổ quốc Việt Nam, rim hơnih jang chinh trĭ-tơpôl păng rim tơdrong tơchơ̆t tơ̆ Chăl IX vă jang kiơ̆ trong jang khul kơdră chĕp pơgơ̆r 2 kâp, ưh kơ đei pơih să lơ̆m rim tơdrong anai.

Kơdră chĕp pơgơ̆r Kuô̆k hô̆i akhan, hrei ou kon pơlei, bơngai tăh hla gô chang jang kiơ̆ trong jang pơm kơtoei khul jang, bơ̆ jang ‘lơ̆ng, jơnei. Kơ yuơ yan ou, khei năr ou ki, Đảng, Teh đak jei hlôi pơjing tơdrong Tơchơ̆t vă pơm kơtoei Khul jang, hơnih jang, mă lei tơ̆ yan ou tơdrong pơm tơjur oei lăp lơ̆m nơ̆r pơma, pơm ăn truh khul jang oei tim mă ‘lơ̆ng, ƀiên chê̆ oei lơ:“ ‘Măng mă ou bơ̆n jang kiơ̆ trong tơlĕch ăn pơm kơtoei khul jang kiơ̆ Tơdrong tơchơ̆t 18. ‘Nou jing trong jang trŏ lăp hăm jơhngơ̆m đon kon pơlei. Nơ̆r Đảng, ƀlep hăm jơhngơ̆m đon kon pơlei. ‘Meh vă jang kiơ̆ kĕ trong jang ou lei lơ̆m jăl jang mă ƀar tôch mơnat tat. Tơnap ‘noh kăl hơmet ming Khôi luơ̆t tơm Teh đak. Bơ̆n hlôi pơdrơ̆ng kiơ̆ pơjing Hơnih bơ̆ jang chih hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm Teh đak sơnăm 2013 hlôi tơbăt hơdăh bơih, trong pơprŏ vă jang hơmet ming Khôi luơ̆t tơm Teh đak mĭnh ƀar nơ̆r tơbăt hơdăh iŏk nơ̆r tơgop đơ̆ng kon pơlei đơ̆ng năr 6/5 truh năr 5/6, lơ̆m 1 khei, chih akŏm 5 năr, akŏp đĭ đăng ‘noh 35 năr.

Kơdră chĕp pơgơ̆r Kuô̆k hô̆i jei akhan, tơdrong hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm Teh đak sơnăm 2013, rim tơdrong jang pơm pơkeh rim hla bơar pơtho tơbăt jang kiơ̆ vă hơmet ming Khôi luơ̆t tơm Teh đak, pơm pơkeh ‘lơ̆ng tơdrong pơkăp khôi luơ̆t păng rim tơdrong tơchơ̆t kăl iung jang hloi vă pơjing đei trong bơ̆ jang kơjăp ‘lơ̆ng ăn pơgơ̆r tơlĕch jang kiơ̆.

Rim kơdră tang măt Kuô̆k hô̆i jei drơ̆ng mĭnh nơr hăm 8 Apăng hơmet ming lơ̆m Trong vă pơjing Tơdrong tơchơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm Teh đak sơnăm 2013 . Lơ̆m ou, Trong vă pơjing Tơdrong tơchơ̆t pơm hơdăh hơnăp jang păng sơnong jang kơ rim hơnih bơ̆ jang chinh trĭ, tơpôl nhen: Công đoàn Việt Nam, Khul kon pơlei choh jang sa Việt Nam, Đoàn Hơdruh tơdăm cộng sản Hồ Chí Minh, Khul drŏ kăn Việt Nam, Khul Ƀô̆ đô̆i so Việt Nam jĭ rim hơnih jang chĭnh trĭ-tơpôl găh lơ̆m Mặt trận Tổ quốc Việt Nam, sơkơ̆t kiơ̆ trong Nơ̆r pơma pơtôch 127 đơ̆ng Hơnih tơm Chinh trĭ.

Kiơ̆ đơ̆ng bơngai tang măt Nguyễn Thị Thu Nguyệt, khul Dak Lăk, ‘ngoăih rim khul jang chinh trĭ tơpôl găh lơ̆m Mặt trận Tổ quốc Việt Nam oei đei rim khul kon pơlei, tŏk bŏk bơ̆ jang rim tơdrong jang kơ Đảng păng Teh đak. Kơ yuơ lơ loh, bơngai tang măt ou athei, Hơnih chih tơlĕch Trong vă pơjing Tơdrong tơchơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm Teh đak sơnăm 2013 lăng hơlen, tơchơ̆t tơdrong gơh jang kơ rim khul ou:“Tơdrong gơh jang kơ rim khul kon pơlei găh lơ̆m Hơnih bơ̆ jang măt trân kiơ̆ Nơ̆r pơma pơtôch 127 chih tơbăt hơdăh lơ̆m Khôi luơ̆t tơm Teh đak ‘noh lơ liơ, bơ̆ kăl pơm hơdăh tơdrong ‘nou. Bơ̆n ưh kơ gơ̆h lăp krrao akhan lơ̆m Khul rim hơnih jang kơ Mặt trận ‘noh tim mă ƀlep ‘mơ̆i, tim mă trŏ lăp kơjăp ‘lơ̆ng ăn rim Khul ‘nou bơ̆ jang kiơ̆ trong jang Khôi luơ̆t tơm teh đak, khôi luơ̆t păng hơmet ming kiơ̆ Tơdrong tơchơ̆t đơ̆ng Khul kơdră chĕp pơgơ̆r Teh đak, lăp đơ̆ng rŏng Khôi luơ̆t tơm Teh đak đei hơmet ming”.

Mĭnh ƀar nơ̆r tơgop đơ̆ng bơngai tang măt pơngơ̆t, tơ̆ Apăng 110, tăl 3 tơchơ̆t, tơdrong sơkơ̆t hơdăh rim hơnih bơ̆ jang găh hơla dêh char, pơlei tơm lơ̆m Trung ương păng trong tơlĕch pơjing, sơlăh, hơgrop, tơklăh hơnih bơ̆ jang, hơmet ming groi teh hơnih bơ̆ jang kơ yuơ Kuô̆k hô̆i tơchơ̆t. Lơ̆m mă, kiơ̆ Khôi luơ̆t tơm Teh đak sơnăm 2013, tơdrong ou kăl iŏk nơ̆r tơgop đơ̆ng kon pơlei. Bơngai tang măt Nguyễn Minh Hoàng, khul pơlei tơm Hồ Chí Minh tơbăt:“Tơdrong pơjing, sơlăh, hơgrop, tơklăh hơnih bơ̆ jang, hơmet ming groi teh hơnih bơ̆ jang kơ yuơ Kuô̆k hô̆i tơchơ̆t. Tơchơ̆t tơdrong ou kăl iŏk nơ̆r tơgop đơ̆ng kon pơlei tơring, kiơ̆ trong bơ̆ jang ƀlep khôi luơ̆t tơchơ̆t. Tơ̆ ou ĭnh oei ƀơƀreh, pơngơ̆t bơ̆n ưh tơblang hơdăh kơ yuơ kă kiơ bơ̆n hŭt tơdrong ‘nou, lơ̆m mă tơdrong ou tơlĕch jang kiơ̆ ‘lơ̆ng tơdrong hơtŏ hơnơ̆ng dih băl tơ̆ tơring, jang kiơ̆ ‘lơ̆ng nơ̆r tơgop đơ̆ng kon pơlei tơring hăm tơdrong kăl păng jei tơƀôh hơdăh nơ̆r Đảng, jơhngơ̆m đon kon pơlei”.

Bơngai tang măt Nguyễn Thành Trung, khul Yên Bái pơma tơbăt nơ̆r tơgop:“Trong vă pơjing ou ưh kơ đei tơchơ̆t hơdăh iŏk nơ̆r tơgop đơ̆ng kon pơlei tơring mưh vă pơjing, sơlăh, hơgrop dăh mă hơmet ming groi teh bơ̆ jang mă lei kơ yuơ Kuô̆k hô̆i tơchơ̆t. Kiơ̆ kơ ĭnh, ‘moi kiơ̆ tơdrong khôi luơ̆t, chĕp pơgơ̆r teh đak păng tơpôl ‘noh tơdrong iŏk nơ̆r tơgop đơ̆ng kon pơlei mưh pơjing, sơlăh, hơgrop, klăh asong tơring, hơmet ming groi teh ‘noh tôch kơ kăl”.