Lêh tơlĕch jang tơ̆ Đắk Lắk đei tơdrong vang akŏm đơ̆ng bơngai tang măt Jơnŭm ‘long pơglang ƀrê 19 dêh char, pơlei tơm tơring Tŏk bŏk, Tây Nguyên. Kiơ̆ đơ̆ng noh hlôi tơgŭm dêh char Đắk Lắk hloh 4,5 ti hlak vă tơlĕch jang dôm tơdrong jang Khei ‘mêm mơnat.

Găh Đắk Lắk, dêh char tơchĕng hơdrol vă pơgơ̆r tŏ sĕt hloh 4 tơdrong jang khăm jĭ, asong đĕch pơgang, pơm păng hơmet ming 6 hơnih sŏng sa oei kơtă tơ̆ kơ ‘năr tơ̆ dôm apŭng pơmat tat; asong tơmam, gre tang vang, jên hŏk ƀŏng, tơgŭm tơdrong jang sa ăn dôm ŭnh hnam pơmat tat, hŏk tro dơnuh yak hloh pơmat hŏk ‘lơ̆ng. ‘Nâu jĭ sơnăm mă 4 Khei ‘mêm mơnat đei tơlĕch jang jơ̆p lơ̆m teh đak. Hăm hơnăn “Tơdrong jang ‘mêm mơnat - Păr ang tơdrong ‘mêm kơ eng”, Khei ‘mêm mơnat sơnăm ‘nâu bơ̆jang đơ̆ng ‘năr 8-19/5, tơlĕch nơ̆r hơgăt krao hơvơn, mong akŏm đei tŏ sĕt hloh 400 ti hlak jên vă tơlĕch jang dôm tơdrong jang ‘mêm mơnat.