Pơgê năr 12/5, tơ̆ pơlei tơm Gia Nghĩa, Hơnih tơm Kŏng ang jang hơdoi hăm Hơnih vei lăng kon pơlei dêh char Dak Nông atŭm hăm rim hơnih tơgŭm djru hlôi pơgơ̆r Pơm lêh iung jang kăl tơ iung pơjing ming man, xut xa hnam pơgia, hnam hnăt hnot; adoi sơng iŏk kon jên păng pơjao rup ming man hnam lơ̆m dêh char. Hơnih tơm Kŏng ang hlôi chă hơvơn păng pôk ăn 30 ti hlak jên vă tơgŭm ming man 500 pơbŭng hnam ăn ŭnh hnam dơnuh, vă jê̆ dơnuh păng ŭnh hnam đei iŏk yua ăn teh đak dang ei hơrih sa tơnap tap găh hnam oei lơ̆m dêh char Dak Nông. Tơ̆ jơ pơm lêh, Trung tướng Phạm Thế Tùng - Kơ iĕng Kơdră chĕp pơgơ̆r Hơnih tơm Kŏng ang hmach chơt hơ iă ăn rim ŭnh hnam đei sơng iŏk hnam oei, adoi pơtruh nơ̆r hôn bơnê kơ rim bơngai tơgŭm djru, rim hơnih bơ̆ jang tơ̆ dêh char Dak Nông hlôi vang yak hơdoi, iung jang hơdoi hăm Hơnih tơm Kŏng ang lơ̆m bơ̆ jang xut xa hnam pơgia, hnam hnăt hnot lơm dêh char. Kiơ̆ trong pơprŏ jang, dêh char Dak Nông gô xut xa akŏp 1.755 pơbŭng hnam hnăt hnot, tơgŭm djru ŭnh hnam dơnuh, vă jê̆ dơnuh, ŭnh hnam đei iok yua ăn teh đak păng kon pơlei kon kông lơ̆m dêh char. Jô̆ truh dang ei, dêh char hlôi jang ming man keh đang 75% tơdrong jang păng tơchĕng lăng gô jang keh đang tơdrong xut xa hnam pơgia, hnam hnăt hnot hơdrol năr 30/8/2025.