Tơdrong pơgơ̆r ou kơ yuơ Trung ương Khul drŏ kăn Việt Nam tơlĕch ăn vă tơgŭm djru, rong ‘me đe hơ ioh mơti mơtek hơrih sa mơmat tat. Đơ̆ng rŏng vă jê̆ 5 sơnăm tơlĕch jang tơdrong jang, tơ̆ Gia Lai  hlôi đei 172 ‘nu mĕ hơđơ̆ng kơpă păng 150 ‘nu mĕ hơđơ̆ng tơgŭm djru. Rim mĕ hơđơ̆ng tơ̆ dêh char tŏk bŏk tơgum djru, vei lăng năng tông, rong ‘me 407 ‘nu hơ ioh mơti mơtĕk. ‘Moi kiơ̆ lơ trong tơgŭm djru, tơdrong pơgơ̆r hlôi hơvơn pôk ăn hloh 57.000 tơnô̆ tơmam drăm, 580 tơnô̆ kon jên hŏk pơhrăm, 185 tong tang vang, tơgŭm ming hơmet hnam oei ăn hơ ioh mơti ... kơjă kơjên vă jê̆ 10 ti hlak jên. Tơ̆ jơ pơm lêh, rim bơngai tang măt hlôi pơma dơnuh dih băl dôm trong jang hơ iă lơ̆m krao hơvơn tơpôl vang iung jang, krao hơvơn rim khul jang, rim bơngai vang vei lăng năng tông đe hơ ioh mơti mơtĕk; dôm nơ̆r pơma tơbăt jơhngơm đon oei tơtăm đơ̆ng kang ƀô̆ khul mưh tơlĕch jang tơdrong vă jang; jơhngơ̆m đon đe mĕ hơđơ̆ng mưh iŏk vei lăng năng tông đe hơ ioh pơm kon hơ ‘lơ̆p, pơjing ăn đe oh đei hơnih oei sa ‘lơ̆ng rŏ hơbŏ nhen.