Pơm kiơ̆ Tơchơ̆t pơjing Tơring tơrang 'nao, Đảng ƀô̆ xah Tà Nung sơkơ̆t hơdah ou jĭ sơnong jang chĭn trĭ kăp gĭt, jing trong hơtŏk mŭk drăm – tơpôl. Lơ̆m noh, tơdrong jang pơtho gah đon bơnôh chĭn trĭ đei pơtơm jang tôm, pơjing tơdrong drơ̆ng minh lơ̆m akŏm păng pơm jang đơ̆ng đe kan ƀô̆, đảng viên păng tôm kon pơlei pơm kiơ̆ dôm tơchơ̆t pơjing tơring tơrang 'nao.

Atŭm hăm noh, xah Tà Nung hlôi hơvơn tôm khul jang vă ming hơmet anih jang. Truh dang ei, trong nơnăm tơ̆ tơring sơđơ̆ng 'lơ̆ng, tôm jăl trong nơnăm lơ̆m pơlei đei pơm hăm ƀê tŏng ngăl, tơgŭm ăn kon pơlei vih vơ̆t hiôk hian hloh. Thong hơbong đak đei ming hơmet, đei mah đak ruih ăn 'long pơtăm, noh 'long pơtăm đei lơ plei hloh. Atŭm hăm noh, hnam trưng hŏk, hnam pơgang, hnam hơkŭm joh ayŏ adoi đei asong ming man, pơtrŏ hăm tơdrong kăl hŏk hơlen păng vei lăng jơhngơ̆m jăn ăn kon pơlei.

Gah tơdrong jang mŭk drăm, xah hơvơn kon pơlei tơplih hơdrĕch 'long pơtăm, kon yŏng vă pơm tơlĕch tơmam drăm kăl, jang kiơ̆ khua hŏk kih thuơ̆t. Sơnăm 2024, tơdrong iŏk yua kơ rim bơngai jang tơ̆ xah đei truh 60 triu hlj. Mă kăl, tơdrong choh jang xa kiơ̆ trong 'nao tơguăt hăm tơmang pơhiơ̆ pơlei pơla hlôi pơyua lơ gah mŭk drăm, asong tơdrong jang sơđơ̆ng ăn lơ bơngai jang tơ̆ tơring.

Atŭm hăm tơdrong jang hơtŏk mŭk drăm, xah adoi tơrĕk truh tơdrong vei răk tơƀăk mong joh ayŏ kon pơlei kon kông. Lơ tơdrong akŏm joh ayŏ kơdŏ suang đei pơgơ̆r hơnơ̆ng, pơjing cham pơhiơ̆ 'lơ̆ng hơ-iă ăn kon pơlei. Dôm tơdrong jang "Tôm kon pơlei tơguăt tơguăl pơjing tơdrong hơrih joh ayŏ 'lơ̆ng", "Kon pơlei choh jang, tĕch pơdro hơgei", "5 ưh, 3 rơgoh, 5 ưh 3 đei" đei tơlĕch jang lang să, tơgop pơjing tơdrong hơrih hơgei kiơ̆ trong 'nao.

Rim tơchơ̆t pơyua ăn tơpôl đei pơm jang tơnăp, vei sơđơ̆ng rim kon pơlei adoi đei tơrĕk hăm tơdrong jang khăm hơmet ming jĭ jăn, pơtho hŏk pơhrăm păng tơgŭm gah trong pơm jang. Dang ei xah Tà Nung pă đei unh hnam hin dơnuh bơih. Kơsô̆ măt kon pơlei chă răt ƀao hiêm hơmet jĭ jăn đei 97%. Tôm đe hơ-ioh truh sơnăm năm hŏk adoi đei năm hŏk tơ̆ hnam trưng, tơdrong pơtho hŏk pơhrăm đei hơtŏk hơnơ̆ng...

Kiơ̆ kơ ƀok Kră Jăn Ha Diệp, Phŏ Ƀĭ thư Đảng uy xah Tà Nung, dôm tơdrong jang đei jơnei jing tơdrong bơ̆ng pang ăn tơdrong hơdrin kơ-'nôh đơ̆ng tôm anih jang chĭn trĭ păng kon pơlei. Vă pơtoi iŏk jang kiơ̆ dôm tơdrong jang jơnei lơ̆m pơjing tơring tơrang 'nao, xah hơtŏk sơnong jang kơ dôm jăl pơgơ̆r kơpal, jơnŭm pơgơ̆r tơring, măt trâ̆n păng anih jang chĭn trĭ - tơpôl, mă kăl noh sơnong jang đơ̆ng kon pơlei. Rim tơchơ̆t jang athei đei tơroi hơdah, pơjing đei tơdrong drơ̆ng minh lơ̆m kon pơlei.

Atŭm hăm hơtŏk pran gah mŭk drăm choh jang xa kiơ̆ pơkăp kơjăp sơđơ̆ng, tơring adoi tơrĕk hloh gah tơdrong hơvơn anih jang mŭk drăm tơmơ̆t asong jang. Tà Nung adoi hơtŏk hơvơn dôm anih jang tơgŭm vă asong ming man keh đang tơdrong kăl, tơrĕk truh tơdrong vei lăng cham char, pơjing cham char tơring tơrang hơdah – jơk – rơgoh – 'lơ̆ng.

Hăm tơdrong atŭm jơhngơ̆m pơm jang đơ̆ng tôm anih jang chĭnh trĭ păng kon pơlei, xah Tà Nung tŏk bŏk oei dar deh keh đang tơchơ̆t pơjing tơring tơrang 'nao 'lơ̆ng hơƀăp. Tơchơ̆t kơjung hloh 'noh hơtŏk pơ-'lơ̆ng tơdrong hơrih ăn kon pơlei, vei sơđơ̆ng hơtŏk tơ-iung kơjăp sơđơ̆ng.