Đơ̆ng hơnê̆ khei 4, dôm anih dăng oei hăm hơkŏp hloh 2.000 lăm oei tơ̆ thĭ trơ̆n Măng Đen, apŭng Kon Plông, dêh char Kon Tum hlôi đei tơmoi truh tơmang chih măt oei ah pơdơh lêh năr 30/4 păng năr 01/5. Lơ̆m tơdrong sô̆ chơt kơ tơmang pơhiơ̆ Măng Đen hrei ou, tơnap vă tơchĕng gah đunh kơ ou, tơring teh 7 dơnou 3 chơkơi đak oei bri kơdrơ̆ng, mă tơm noh trong năm iĕ ioch hăm sơmĕch roi văng ƀenh ƀang.

Găn ga khei năr blŭng tơnap tap Măng Đen dar deh sơkơ̆t hơdah hơnăn po jing minh anih akŏm hơlen tơmang kơ Tây Nguyên bri kơdrơ̆ng đơ̆ng tơmoi hơtaih jê̆. Ƀok Nguyễn Xuân Hùng, minh tơmoi truh đơ̆ng anih tơm Hà Nội chơt hơ-iă ah chôt vih tơmang Măng Đen: “Inh năm truh Măng Đen lơ ‘măng bơih, hơlen băt gah cham char păng tơmam xa kơ tơring. Măng Đen ‘lơ̆ng nhen kơ hơdruh 18 sơnăm ‘nao tih iung, vă sơng tôm đe tơdăm đơ̆ng rim tơring kơ teh đak truh tơ̆ ou tơmang lăng cham char ‘lơ̆ng rŏ kơ Măng Đen ou. Minh sơnăm athei năm truh 2, 3 ‘măng vă pơchơt hăm đe buăl tơ̆ tơring teh Măng Đen ou”.

Pêng sơnăm kơ ou, tơmang pơhiơ̆ Măng Đen - Kon Plông hơnơ̆ng ƀôh tŏk lơ, rim sơnăm adoi sơng kơ hrĕng rơbou ‘nu tơmoi truh tơmang. Rim anih asong jang adoi nhen tơmoi hơnơ̆ng năm truh tơring teh ou păng ou jĭ jơhngơ̆m pran vă Măng Đen tơplih hơkou hơkar rim năr.

Vă hơtŏk tơdrong pran ăn Măng Đen lơ̆m um la kak tơmang pơhiơ̆, lơ̆m dôm sơnăm kơ ou dêh char Kon Tum hlôi asong ming man anih jang, bơngai jang păng hơtŏk chă tơbang, tơroh pơjing đei tơdrong jang tơmang pơhiơ̆ lơ̆m păng ‘nguaih kơ teh đak. Ƀok Đặng Đình Toán, Kơdră anih jang Joh ayŏ, Khua hŏk păng Tơroi tơbăt apŭng Kon Plông ăn tơbăt, hăm sơkơ̆t hơtŏk tơmang pơhiơ̆ kơjăp sơđơ̆ng tơguăt hăm vei răk tơƀăk mong păng iŏk yua dôm kơjă joh ayŏ juăt jue kơ kon pơlei kon kông tơ̆ tơring, apŭng mă blŭng pơjing đei anih ‘măn jong ăn tơmoi: “Truh dang ei nhôn hlôi đei hloh 142 anih oei. Kơdih po kon pơlei kon kông hlôi băt iŏk yua tơdrong pran kơ unh hnam păng bơbŭng hnam po đơ̆ng noh vă hơtŏk jang tơmang pơhiơ̆. Gah tơmam drăm tơmang pơhiơ̆, nhôn tơrĕk truh tơmam choh pơtăm kiơ̆ trong ‘nao ‘lơ̆ng păng dôm tơmam drăm akŏm ƀenh kơ joh ayŏ, nhen akŏm kơchơ Măng Đen, Anih mŭk drăm kơmăng, Pơgar joh ayŏ ‘lơ̆ng Măng Đen. Tơmam tơmang pơhiơ̆ mă nhôn tơrĕk truh noh tơmam tơmang pơhiơ̆ gah cham char”.

Atŭm iŏk yua jơhngơ̆m pran tơ̆ tơring teh 7 dơnou 3 chơkơi đak kră sơ̆ păng tơmang pơhiơ̆ Măng Đen-Kon Plông hrei ou tŏk bŏk dơ̆ng ah trong jang yak truh đak dơsĭ să ah mă dêh char Quảng Ngãi păng Kon Tum pơm kiơ̆ tơchơ̆t tơmơ̆t hơdai.

Yơ̆ng ou ki, kơdră 2 dêh char Quảng Ngãi păng Kon Tum hlôi rơih Măng Đen vă pơgơ̆r ‘măng pơm jang mă blŭng pơđăp gah tơdrong tơmơ̆t hơdai 2 dêh char. Lơ̆m lơ tơdrong đei pơđăp noh tơdrong hơmet ming jăl trong 24 păng hơtŏk tenh tơdrong ming man jăl trong kơdou renh đei 2 dêh char drơ̆ng lăp hloh. Ƀok Bùi Viết Hà, Kơdră Jơnŭm jang Tơmang pơhiơ̆ Măng Đen ăn tơbăt, ou jĭ tơdrong hiôk hloh vă tơdrong tơmang pơhiơ̆ bri – dơsĭ hơtŏk pơm jang: “Jơnŭm pơgơ̆r teh đak tơmơ̆t hơdai dêh char Quảng Ngãi - Kon Tum, nhôn dôm bơngai jang tơmang pơhiơ̆ tơ̆ Măng Đen sô̆ chơt dêh. Măng Đen oei ah anih teh dơnơm. Măng Đen jĭ hơnih tơm tơmang pơhiơ̆ kơ dêh char ‘nao, noh nhôn lui gô kĕ hơtŏk tơ-iung. Dôm bơngai jang tơmang pơhiơ̆ athei hơmet ăn kơdih po minh trong jang kơchăng asong đơ̆ng jơhngơ̆m truh jên hu vă tơplih um rŭp anih jang kơ po. Jơnŭm jang tơmang pơhiơ̆ nhôn adoi tơchĕng truh trong jang, sơkơ̆t hơdah vă mă kiơ̆ tom trong tơlĕch jang ăn tơring teh ou”. 

Đơ̆ng tơring teh phui phang tơnang kŏ đơ̆ng rŏng kơ tơblah tơblŭng, Măng Đen - Kon Plông hrei ou hlôi pơjing dơh po đei minh um rŭp ‘nao sơđơ̆ng, tơguăt păng pran kơtang. Dôm jăl trong yak tơ̆ tơring teh 7 dơnou 3 chơkơi đak dang ei hlôi kơdrơ̆m sô̆ sôn, ƀenh kơ yak jơ̆ng tơmoi truh tơmang. Đơ̆ng tơchơ̆t tơmơ̆t hơdai 2 dêh char Quảng Ngãi păng Kon Tum, Măng Đen-Kon Plông tŏk bŏk đei trong hiôk vă yak păr truh đak dơsĭ să sơkơ̆t dơh po lơ̆m um la kak tơmang pơhiơ̆ lơ̆m tơring păng lơ̆m apŭng plenh teh.