Hăm hloh 650 khul akŏm năm jang, lơ̆m khei 3 ou ki, đe hơdruh tơdăm lơ̆m jơ̆p dêh char Lâm Đồng hlôi akŏm jơhngơ̆m đe sơnăm mơlôh pơm jang hloh 500 tơdrong jang hơdruh tơdăm, hăm kơjă hloh 4,1 tih hlj. Lơ̆m noh, pơm kiơ̆ tơdrong pơlong atŭm jơhngơ̆m sut lê̆ hnam pơgia, hnam hyah hyok, hăm tơdrong chă hơvơn man 'nao 12 tŏ hnam, tơgŭm 160 năr jang, hăm kơjă tơgŭm hloh 800 triu hlj. Pơgơ̆r jê̆ kơ hrĕng 'măng pơm jang 'Năr tơpơh jơk, năr tơm kơ pơjing tơring tơrang 'nao, hơvơn đei jê̆ 13.500 'nu đoan viên hơdruh tơdăm vang pơm jang. 'Nguaih kơ noh, rim jăl jang Đoan dêh char Lâm Đồng hlôi akŏm 137 khul hơdruh tơdăm năm jang kiơ̆ pơkăp "Ƀinh yân hŏk vŭ sô̆", tơgŭm ăn jê̆ 10.000 măt kon tơrĕk hăm tơdrong yua kơmăi kơsô̆.

Pơmai Trần Anh Tú, Ƀĭ thư Anih jang đoan pơlei tơm Đà Lạt akhan, dôm tơdrong jang đei jơnei ou hlôi tơƀôh hơdah sơnong jang kơ akŏm jơhngơ̆m sơnăm mơlôh lơ̆m tơdrong jang hơtŏk mŭk drăm tơpôl tơ̆ tơring: “Kiơ̆ kơ dôm tơdrong jang ou noh nhôn sô̆ hơ-iă kơlih đe đoan viên vang jang tôch tơnăp. Tơdrong mă noh sơkơ̆t hơdah, sơnăm mơlôh pôk bơnê kơ tơdrong hơrih yă ƀok sơ̆ păng pơ-ư pơ-ang hăm tơdrong juăt jue nuih mơng noh đơ̆ng mih ma yă ƀok yuk hơlou. Păng kiơ̆ rim tơdrong pơm jang thoi noh, đe sơnăm mơlôh hơnơ̆ng chih tơƀlŏk, hơdrin hloh dơ̆ng lơ̆m tơdrong pơm jang, hŏk pơhrăm vă pơtoi tơ-iung pơjing pơlei pơla teh đak gơh 'lơ̆ng”.

Kiơ̆ kơ 'nhŏng Trương Văn Tùng, kan ƀô̆ Anih jang đoan dêh char Lâm Đồng, hăm tơdrong pơgơ̆r jang hơgei, tơdrong jang trŏ ƀlep, dôm tơdrong jang ou hlôi pơlan să pran kơtang lơ̆m hơdruh tơdăm păng tơpôl. Kiơ̆ đơ̆ng noh, iŏk yua jơhngơ̆m pran, sơnong jang tơnăp đơ̆ng đe mơlôh, pơjing đei tơdrong pơlong jang kăp gĭt păng hơvơn lơ bơngai jang lơ̆m đoan viên, hơdruh tơdăm lơ̆m jơ̆p dêh char: “Lơ̆m sơnăm 2025, nhôn pơkăp gô pơgơ̆r tŏ sĕt jat noh 4 'măng iung pơm jang pơjing tơring tơrang 'nao păng 'Năr tơpoh jơk vă pơm thoi yơ tơdrong jang noh gơh pơm jang hơnơ̆ng păng kăp gĭt. 'Nou jĭ dôm tơdrong jang hlôi pơgơ̆r đơ̆ng đunh sơ̆ păng nhôn hơnơ̆ng pơtoi pơm jang tơdrong tơlĕch jang ou ”