Kiơ̆ chih jô̆ đơ̆ng Hơnih vei lăng tơdrong Jĭ jăn pơlei tơm Hồ Chó Minh, lăp lơ̆m 1 giĕng, pơlei tơm hlôi chih iŏk hloh 300 ‘nu jĭ pơlŏ lĕch đe. Akŏm kơsô̆ bơngai jĭ pơlŏ lĕch đe đơ̆ng blŭng sơnăm 2025 truh dang ei ‘noh vă jê̆ 6000 ‘nu. 

Kŭm lơ̆m 1 giĕng, pơlei tơm kŭm chih iŏk hloh 300 ‘nu jĭ jơ̆ng ti bơ̆r. Akŏm kơsô̆ bơngai jĭ jơ̆ng ti ƀơ̆r jô̆ đơ̆ng blŭng sơnăm 2025 truh dang ei ‘noh vă jê̆ 2300 ‘nu. 

Chih iŏk đơ̆ng bơngai chih kơtơ̆ng ang tơ̆ Hnam pơgang Nhi đồng 2 pơlei tơm Hồ Chí Minh, lơ hơioh jĭ đơ̆ng dôm dêh char năm hơmet yua kơ mĕ ƀă hli bơngơ̆t hnam pơgang dêh char, apŭng ưh kơ kĕ hơlen lăng băt ƀlep tơdrong jĭ.

Ƀơ̆t jĭ grŏnh tam mă đĭ, jĭ jơ̆ng ti ƀơ̆r păng pơlŏ lĕch đe tŏk bŏk mơ̆t lơ̆m pơyan gô tôch kơ mơmat tơdăh ưh kơ đei vei lăng.

‘Nhŏng Phạm Đức Tuấn đơ̆ng dêh char Bình Phước ba kon 2 sơnăm jur tơ̆ pơlei tơm hơmet, mă đơ̆ng băt tơ̆ tơring đei tôm pơgang păng trong hơmet ră mă lei năm tơ̆ Nhi đồng 2 ŭnh hnam mă sơđơ̆ng jơhngơ̆m:

“Tơ̆ ti hơlen lăng ‘noh jĭ hơlŏng pơm ăn yuh, jur tơ̆ âu tŏk bŏk khăm hoach jên gô iŏk pơtôch hơlen lăng ‘noh mon gơ̆ ƀĭch kơ̆p kư̆u. Blŭng a oei tơchĕng đei jĭ hơving văi mă lei dang 3-4 jơ đơ̆ng rŏng mon pơtơm lĕch dơ̆ng hmrŏng hmrônh, đe duch akhan ba tơ̆ khoa hơmet jĭ tơpoh hơlen lăng ‘noh akhan mon jĭ jơ̆ng ti ƀơ̆r”.

Lei lăi thoi noh, Lê Thị Huyền (dêh char Đồng Nai) kŭm ba kon năm tơ̆ hnam pơgang 2 ‘măng yua kơ hơdrol ‘noh đeu jĭ păh lăp ăn hơmet brŏk tơ̆ hnam:  

 “Năr ƀar pơtơm yuh mă lei truh năr puăn ‘mơ̆t năm khăm tơ̆ âu, rŏ lăng ƀak si ƀôh jĭ păh lăp ăn huch pơgang răp hơlen lăng. Đĭ 2 năr ƀôh mon ưh kơ dă ƀiơ̆ tep ‘noh đei kơdrăt, nŏng kơ nhơ̆m, ưh kơ ‘meh sŏng sa păng yuh kơna ba năm tơ̆ âu dơ̆ng. Hơmet hoei bơih ‘noh năr ‘nâu mon đei vih tơ̆ hnam”.

Jĭ jơ̆ng ti ƀơ̆r tam mă đei pơgang vắc xin, mă lei hlôi đei trong hơmet, dôm hnam pơgang dêh char tă kơ đei pơhrăm ngăl, mă lei tơtăm bơngơ̆t dêh lơ mĕ ƀă ba kon năm tơ̆ pơlei tơm hơmet pơm ăn dôm hnam pơgang hơmơt hrăt hrot dêh.

Lơ̆m kơplăh ‘noh, ƀak si Dư Tuấn Quy, Kơdră vei lăng Khoa Nhiễm- Thần kinh, Hnam pơgang Nhi đồng 1 roi tơbăt, jĭ jơ̆ng ti ƀơ̆r giĕng ‘nâu đei ƀôh tŏk lơ. Dang ei đei 18 ‘nu jĭ jơ̆ng ti ƀơ̆r tơ̆ khoa hơmet ƀĭch kơtă tơ̆ hnam pơgang, jô̆ păh lăp 1 năr đei 15-20 ‘nu mon đei jĭ jơ̆ng ti ƀơ̆r đei ăn hơmet brŏk tơ̆ hnam, tam mă đei bơngai hơ yơ dêh.

Hnam pơgang tơdra hơdrol jĭ gô đei hơlơ̆k dơ̆ng kơna hlôi pơhăm hrôih ăn kơ dôm bơngai jang pơgang, dôm hnam pơgang dêh char păng mă loi ‘noh hơmet ăn pơgang vă tơjră jĭ. Hơdrô̆ jĭ Grŏnh, khoa oei tŏk bŏk đei 40 ‘nu lơ̆m khoa, đei ƀôh tơjur bơih. Mă lei, ƀak si pơtho tơtă kơ kon pơlei kăl kơ ƀet bơ̆ng jĭ grŏnh hăm bơngai ‘lŏ păng hơioh đei 95% vă iŏk đei tơdrong pran tơpôl, vei lăng dôm bơngai đei hơmơt nhen jĭ plei nuih, plei lĕn hư, ung thư. 

Ƀak si Quy kŭm pơtho tơtă dơ̆ng, jăl jang đơ̆ng khei 4 truh khei 6 ‘noh pơtơm đei jĭ jơ̆ng ti ƀơ̆r păng đơ̆ng rŏng ‘noh jĭ pơlŏ lĕch đe. Yua thoi noh kŭm hơmet ăn jơhngơ̆m đon, hơtŏk jơhngơ̆m pran, ƀet bơ̆ng dôm kơ loăi jĭ hơ yơ đei pơgang vắc xin:

 “Jĭ grŏnh kăl athei hơnơ̆ng ƀet bơ̆ng, mă loi ‘noh jĭ dôm tơring kăl athei jăh tơtĕnh. Ĭnh pơtho tơtă ƀĕt bơ̆ng mưh hơioh đei 6 khei, mă hơdrol athei ƀlŏk păng pơm tơdrong ‘noh vă đe hơioh hoei kơ đei jĭ, kăl kơ lăng kăl dôm bơngai đei jĭ đơ̆ng hơdrol. Mưh iŏk đei tơdrong pran lơ̆m tơpôl ưh kơ đei bơngai jĭ grŏnh ‘nao ‘noh mă pơtôch đei pơrang jĭ. Mă 2, bơ̆n tơroi tơbăt pơm liơ vă kon pơlei băt đei đơ̆ng khei 4 truh khei 6 pơyan jĭ jơ̆ng ti ƀơ̆r vă kơchăng tang găn. Kon pơlei kăl kơ bơngơ̆t truh ƀiơ̆ păng ‘nĕ kơ pơm pơ hơi ‘noh jĭ dôm tơdrong jĭ nai nhen jĭ pơlŏ lĕch đe,jĭ chŭ. Dôm tơdrong jĭ hơ yơ đei vắc xin tang găn athei tơroi vă kon pơlei ƀet, păng roi tơbăt lê̆ hơdrol yua kơ teh đak bơ̆n teh đak đei jĭ hơbuh gô đei ƀôh prăt sơnăm”.

Tơ̆ Hnam pơgang Nhi đồng 2, Ƀak si Nguyễn Đình Qui roi tơbăt, khei ‘năr âu jĭ pơlŏ lĕch đe, jơ̆ng ti ƀơ̆r đei tŏk bŏk tŏk păng bơngai jang pơgang kŭm bơngơ̆t ƀơ̆t tơdrong 3 kơloăi jĭ gô đei ƀôh hơdai 1 ‘măng hloi:

“Hơdrô̆ jĭ grŏnh đĕch kŭm hơving măt bơih, dang ei thim jĭ pơlŏ lĕch đe đunh kơ âu 2-3 giĕng đei ƀôh tŏk, pơtơm blŭng hơtuch khei ‘nâu jĭ jơ̆ng ti ƀơ̆r pơtơm đei ƀôh bơih. Ĭnh hli bơngơ̆t kơ 3 tơdrong jĭ âu hơdai 1 ‘măng ‘noh tôch kơ lap ăn bơngai jang. Dang ei kăl athei tŭn pran tơroi tơbăt vă mĕ ƀă tang găn lê̆ hơdrol”.