Bơngai hơ ioh ‘noh mon Rơ Châm H’Niê (rơneh sơnăm 2020), oei tơ̆ pơlei Hreng, tơring Hòa Phú, apŭng Chư Păh, dêh char Gia Lai. Kiơ̆ hơlen, bơngai jĭ ou tim mă ƀet vaccine bơ̆ng jĭ grŏnh. Lơ̆m 3 giĕng hơdrol mưh ƀôh jĭ, mon H’Niê ưh kơ đei lĕch đơ̆ng tơring, lăp oei lơ̆m hnam păng bôl boăl lơ̆m lăm hŏk. Oh drŏ nglo kơ mon ou jei đei ƀôh jĭ lơ̆m khei ‘năr ‘noh păng tŏk bŏk ming hơmet hăm tơdrong jĭ ƀôh lĕch đe đei jou jĭ grŏnh. Lăp đơ̆ng rŏng bơngai hơ ioh jĭ lôch, hơnih jang pơgang dêh char Gia Lai hlôi năm puih pơgang pơlôch sơmach jĭ tơ̆ hơnih bơngai hơ ioh ou oei, adoi atŏk kơtang pơtho tơbăt, pơrô̆ athei kon pơlei ba hơ ioh năm ƀet bơ̆ng mă tôm vă tang găn jĭ grŏnh, dă ƀiơ̆ pơm tơpoh tơ̆ kon pơlei. Jô̆ truh dang ei,  Gia Lai hlôi đei hloh 2.500 ‘nu bơngai pơlŏ lĕch đe đei jou jĭ grŏnh păng 217 ‘nu ‘noh tơpoh jĭ grŏnh.