Sơnăm 2024, hăm hơnăp jang jĭ hơnih pơchoh trong, iung jang ăn Kuô̆k hô̆i, Hơnih bơ̆ jang Khul kơdră chĕp pơgơ̆r Kuô̆k hŏu, Jơnŭm vei lăng kon kông, rim Hơnih jang Kuô̆k hô̆i, rim hơnih jang găh Hơnih chĕp pơgơ̆r Kuôk hô̆i, Hơnih jang kơ Kuô̆k hô̆i hlôi tơlĕch jang kiơ̆ păng keh đang lơ tơdrong jang tôch trăp trĭn, lơ̆m ou đei dôm tơdrong jang ‘nao, tơnap. Hơnih bơ̆ jang Kuô̆k hô̆i hlôi tơtom pơchoh trong, iung jang pơgơ̆r jơnei 6 ‘măng hop akŏm Kuô̆k hô̆i, lơ̆m ou đei 4 ‘măng hop akŏm hăt hot păng 2 ‘măng hop akom joăt joe; 33 ‘măng hop akŏm kơ hơnih jang khul kơdră chĕp pơgơ̆r Kuô̆k hô̆i; 7 ‘Măng hop akŏm kăl kơ Hơnih jang Khul kơdră chĕp pơgơ̆r Kuô̆k hô̆i; atŭm hăm lơ tơdrong jang anai kơ Kơdră chĕp pơgơ̆r Kuô̆k hô̆i, rim Kơ iĕng Kơdră chĕp pơgơ̆r Kuô̆k hô̆i.

Hăm dôm tơdrong jang hơdrin kơtang, sơnăm 2024, Hơnih bơ̆ jang Kuô̆k hô̆i hlôi iung jang hơdoi pơchoh trong, bơ̆ jag ăn Kuô̆k hô̆i pơdrơ̆ng kiơ̆ 31 khôi luơ̆t, 7 tơdrong tơchơ̆t, ăn tơgop nơ̆r hăm 21 trong vă pơjing khôi luơ̆t ... tơgop tơtom tơlĕch jang kiơ̆ trong bơ̆ jang đơ̆ng Đảng, trŏ lăp hăm yan ou păng tơdrong hơrih sa, tơgop gĭt kăl lơ̆m jang keh đang rim khôi luơ̆t, jang kiơ̆ rim trong tơlĕch jang pơjing khôi luơ̆t kơ jăl jang păng pơtrŭt kơtang atŏk tơ iung mŭk drăm-tơpôl kơ Teh đak.

Iung pơma pơrô̆ jang tơ̆ Hop akŏm pơtôch tơdrong jang sơnăm 2024, tơlĕch jang sơnăm 2025 kơ Hơnih bơ̆ jang Kuô̆k hô̆i, Kơdră chĕp pơgơ̆r Kuô̆k hô̆i Trần Thanh Mẫn hôn bơnê kơ tang kơ Hơnih bơ̆ jang Kuô̆k hô̆i, rim hơnih jang hlôi hơdrin kơtang, xek tơlang lơ tơdrong tih tên hăm iŏk đei jơnei hơ iă. Pơma hơdăh sơnăm 2025 ‘noh sơnăm pơgơ̆r Hop akŏm tih Đảng ƀô̆ rim hơnih, yak truh Hop akŏm tih kơdră tang măt lơ̆m teh đak ‘măng mă 14 kơ Đảng; hơmet ăn pôk rơ̆ih Kơdră tang măt Kuô̆k hô̆i jăl 16 păng pôk rơih Kơdră tang măt Jơnŭm vei lăng kon pơlei jăl jang 2026 – 2031,… kơ yuơ lơ loh, Kơdră chĕp pơgơ̆r Kuô̆k hô̆i Trần Thanh Mẫn athei Hơnih bơ̆ jang Kuô̆k hô̆i, Khul kơdră chĕp pơgơ̆r Đảng hơnih jang păng Công đoàn hơnơ̆ng iung jang kiơ̆ tơnăp hloh dơ̆ng, tơgoăt pôm nơ̆r ƀơ̆r đon, tơchăr hơ iă vă jang keh đang ‘lơ̆ng tơdrong jang đei pơjao.“Mă blŭng ‘noh kăl hơnơ̆ng tơplih ‘nao trong bơ̆jang “hơmet pơ ‘lơ̆ng” khul jang rim hơnih bơ̆ jang kơ Kuô̆k hô̆i, tĕnh koăng jang keh đang rim tơdrong jang hơmet pơ ‘lơ̆ng pơm kơtoei rim hơnih jang kơ Kuô̆k hô̆i, rim hơnih jang găh Hơnih jang Khul kơdră chĕp pơgơ̆r Kuô̆k hô̆i, rim hơnih jang găh lơ̆m Hơnih bơ̆ jang kơ Kuô̆k hô̆i kiơ̆ nơ̆r tơlĕch ăn đơ̆ng Trung ương.

Kơdră chĕp pơgơ̆r Kuô̆k hô̆i Trần Thanh Mẫn jei athei kăl dăr lăng, tơlĕch nơ̆r athei hơmet ming, tơmơ̆t dơ̆ng rim khôi luơ̆t, tơdrong tơchơ̆t, Tơdrong pơkăp bơ̆ jang kơ Hơnih bơ̆jang Khul kơdră chĕp pơgơ̆r Kuô̆k hô̆i. Adoi, hơnơ̆ng hơmet pơ ‘lơ̆ng, hơnơ̆ng atŏk kơtang jang ‘lơ̆ng, pơchoh trong, iung jang ‘lơ̆ng rim ‘Măng hop akŏm; Kang ƀô̆, đang viên, bơngai jang kăl vei kơjăp jơhngơ̆m đon ‘lơ̆ng, bơ̆ jang hơgei; atŏk kơtang tang găn sa pơgơ̆m pơjĭp, pơhoach brăh brư.

Pơma hơdăh, Hơnih tơm Chinh trĭ hlôi tơlĕch Tơdrong tơchơ̆t 57 găh atok kơtang bơ̆ jang atŏk tơ iung khoa hŏk, kmăi kmŏk, tơplih ‘nao tơchăr păng tơplih kơsô̆ teh đak, Kơdră chĕp pơgơ̆r Kuô̆k hô̆i athei kăl atŏk kơtang jang kiơ̆ kmăi kmŏk kơtơ̆ng ang păng tơplih kơsô̆ lơ̆m bơ̆ jang kơ Hơnih jang Kuô̆k hô̆i, atŭm hăm hơmet pơ ‘lơ̆ng bơ̆ jang pơm hla bơar, trŏ lăp hăm trong tơlĕch jang ‘lơ̆ng, tơbăt dih băl kơtơ̆ng ang, dôm tơdrong tơtom, jơnei.

Kơdră chĕp pơgơ̆r Kuô̆k hô̆i lui akhan, hăm tơdrong hơdrin đĭ ai đơ̆ng rim kang ƀô̆, bơngai jang kơ rim hơnih bơ̆ jang kơ Kuô̆k hô̆i, mă kăl lơ̆m khei ‘năr hrei ou mưh pơđĭ khul chinh trĭ tŏk bŏk iung jang kiơ̆ Tơdrong tơchơ̆t 18, rim kang ƀô̆, đang viên đơ̆ng Kơdră chĕp pơgơ̆r Đảng, công đoàn đei jơhngơ̆m đon kơ jăp iăp kơtang, lui yom kơtang lơ̆m tơdrong chĕp pơgơ̆r đơ̆ng Đảng vă jang kiơ̆ keh đang rim trong tơlĕch jang.

Kơdră chĕp pơgơ̆r Kuô̆k hô̆i jei athei, kang ƀô̆, bơngai jang tơlech jang kiơ̆ kơjăp Nơ̆r athei jang kiơ̆ đơ̆ng Ban Bí thư găh tơdrong pơgơ̆r Têt Ất Tỵ sơnăm 2025, sơđơ̆ng ‘lơ̆ng hơ iă, tơnăp, trŏ lăp hăm tơdrong tơchơ̆t păng hơmet pơ ‘lơ̆ng dôm tơdrong đei ƀôh ưh kơ tom băt, mă kăl lơ̆m khei ‘năr Têt Nguyên đán; athei Hơnih bơ̆ jang Kuô̆k hô̆i lăng ba kơjăp, vei lăng năng tông Têt ăn kang ƀô̆, bơngai jang hơnih bơ̆ jang đei sa Têt chơt hơ iă ‘nă hal, sơđơ̆ng, pơkom.