Tơdrong jang 8 jĭ tơdrong jang kăp gĭt mă blŭng gah drŏnglo drăkăn oei lơ̆m minh Tơchơ̆t jang kơ Teh đak, tơbang hơdah tơdrong tơgŭm kăp gĭt đơ̆ng Đảng păng Teh đak. Jăl sơnăm 2021-2025, Tơdrong jang 8 hlôi đei iŏk lơ jơnei kăp gĭt. Tơdrong jang vei lăng păng pơgơ̆r pơm jang đei pơtơm jang hrôih, hăm tơdrong pơjing Jơnŭm pơgơ̆r jang Tơdrong jang đơ̆ng Trung ương truh dêh char tơ̆ tôm tơring. Trung ương hlôi tơbang 17 hla bar pơkăp pơtho păng pơgơ̆r chă hơlen, sek tơlang dôm tơdrong tơhlăk tơhlĭn mă tơtom.

Jên akŏm pơm jang đei hơvơn tơnăp, hăm jên mong asong jang đei jê̆ 2000 tih hlj, mă tơm noh đơ̆ng Trung ương. Lơ tơchơ̆t dơnơm tơrĕk truh pơjing khul jang tơroi tơbăt ăn kon pơlei, kâu lak ƀô̆ kơ tơdrong tơplih, păng hơtŏk tơdrong jang hơbĕch ăn kang ƀô̆ drăkăn bơngai kon kông hlôi đei jơnei hloh kơ pơkăp. Dôm tơdrong jang nhen "Hơnih lui ngeh" hlôi jang tơnăp, phơ phŏ tơgŭm đei đe drŏnglo hloi gah dôm tơdrong đei tơrĕk truh.

Mă jang đei jơnei kăp gĭt, tơdrong tơmơ̆t jang hơdoi drŏnglo drăkăn lơ̆m dôm tơdrong pơkăp đơ̆ng Tơchơ̆t jang kơ Teh đak tơ̆ tơring kon pơlei kon kông păng groi kông tŏk bŏk oei ƀơm lơ "tơhlăk tăk" athei đei pơkăp hơdah. Noh jing tơdrong oei tơjruh lơ̆m asong păng iŏk yua jên mong kơ tơring; jing dôm tơdrong tơnap tap lơ̆m pơkăp bơngai iŏk jang păng tơlĕch kiơ̆ tơdrong chih akŏm; jing dôm tơdrong oei tơhlăk lơ̆m pơhrăm hơtŏk pơm jang mă hơbĕch; dah mă tơhlăk lơ̆m tơdrong tơmơ̆t jang hơdoi lơ̆m dôm tơdrong pơkăp jang nai.

Gah dôm tơdrong oei tơjruh lơ̆m asong păng iŏk jên jang, mă Anih tơm jang Jên Hu hlôi đei Tơchơ̆t 55 pơm trong hiôk vă tơring asong jên mong, mă lei tơpă noh, lơ dêh char tơring kon kông păng groi kông ƀơm lơ tơnap tap gah tơdrong pơyua, pơm ăn tơdrong asong jên jang ăn Tơdrong jang 8 tam mă trŏ nhen tơdrong kăl. Dôm khul chă tơroi tơbăt lơ̆m pơlei pơla, mă đei akŏm păng pơhrăm, đei iŏk tŏ sĕt jên asong, ưh kơ mah vă pơm jang mă tơpă. Tơdrong jang chă hơvơn jên jang lơ̆m tơpôl adoi ƀơm lơ tơnap tap, tam mă đei jơnei nhen 'meh vă.

Tơroi kơ dôm tơdrong tơjruh lơ̆m tơmơ̆t jang hơdoi drŏnglo păng drăkăn lơ̆m dôm tơdrong pơkăp jang nai, đơ̆ng bơngai juăt jang tơlĕch tơchơ̆t trong jang, Tiến sĩ Phạm Thái Hưng ăn tơbăt: dôm hla bar pơkăp pơtho đơ̆ng Trung ương păng tơring tam mă tơpă tơrĕk truh tơdrong ou tôm tong:  "Lơ̆m kơsô̆ jê̆ 200 pơkăp pơm jang đơ̆ng Tơchơ̆t jang kơ Teh đak, đei truh 71 kơsô̆ pơkăp đei asong kiơ̆ drŏnglo păng drăkăn, mă lei tơdrong pơm jang tơpă noh oei ƀơm lơ tơnap tap. Tơdrong mă ou pơm ăn sơnong jang pơhơtŏ drŏnglo drăkăn tơ̆ tơring kon kông, sơ̆ hlôi tơnap tap, roi tơnap vă đei jơnei nhen Tơchơ̆t tơlĕch jang đơ̆ng teh đak"

Adoi kiơ̆ kơ Tiến sĩ Phạm Thái Hưng, vă hơtŏk jang đei jơnei tơmơ̆t jang hơdoi drŏnglo păng drăkăn, vei sơđơ̆ng ăn dôm tơchơ̆t gah hơtŏ 'lơ̆ng drŏnglo păng drăkăn đơ̆ng Tơchơ̆t 88 Kuôk hô̆i păng Tơchơ̆t jang kơ teh đak, kăl đei dôm tơplih kăp gĭt lơ̆m tơlĕch jang. Lơ̆m noh athei tơmơ̆t jang hơdoi lơ̆m tôm tơdrong tơlĕch jang lơ̆m Tơchơ̆t jang kơ Teh đak. Tơdrong mă ou athei pơtho mă hơdah gah pơkăp jên mong păng trong pơm jang, đơ̆ng Hơnih asong jang Tơchơ̆t jang kơ Teh đak păng Hơnih jang gah Kon kông. Athei tơplih 'nao lơ̆m tơdrong hơtŏk bơngai pơm jang. Tơplih đơ̆ng pơhrăm tŏ sĕt năr jing trong jang hơtŏk kiơ̆ tơdrong jang, tơrĕk truh tơdrong đei ƀôh păng tơdrong hlôh vao. 'Nguaih kơ noh, athei hơtŏk tơroi tơbăt lơ̆m pơlei pơla; Sơkơ̆t hơdah tơdrong tơm tơlĕch pơm jang păng pơtoi pơih să dôm tơdrong jang kăp gĭt đei jơnei tơnăp.

Tơdrong sek tơlang dôm tơdrong oei tơhlăk ưh hơdrô̆ hơtŏk đei jơnei tơnăp kơ Tơdrong jang 8 mă oei jing tơdrong tơm kăp gĭt vă Tơchơ̆t jang đơ̆ng teh đak hăm tơring kon kông păng groi kông tơpă đei jơnei kiơ̆ tơchơ̆t tôm gah hơtŏk tơ-iung kơjăp păng hơtŏ hơnơ̆ng, ưh đei prơih lê̆ bơngai ayơ tơ̆ rŏng.