Năm truh tơ̆ Hơnih bơ̆ jang pơm hla bơar tơring Ea Rốk, dêh char Dak Lăk vă pơm hla bơar rơneh ăn hơ ‘lơ̆p, ‘nhŏng Đinh Thanh Hùng, (oei tơ̆ thôn 3) hlêng hlang kơ đon, sơ̆l vơ̆l hăm bơ̆ jang điên tư đei tơlĕch ăn. Lăp đơ̆ng rŏng rim đoàn viên hơdruh tơdăm jang tơ̆ ou pơtho phăl hơlăng, ‘nhong mă băt pơm hla bơar kiơ̆ kmăi kmok ou. Lăp dôm jĭt pơnĭt jơ đĕch, dôm tơdrong pơm hla bơar hlôi keh đang. ‘Nhŏng Đinh Thanh Hùng tơbăt:“Lăp đơ̆ng rŏng rim boăl đoàn viên, hơdruh tơdăm chă pơtho ‘noh ba chih lơ̆m yĭch vŭ kŏng lơ̆m điên thoăi. Rim đe boăl đoàn viên, hơdruh tơdăm chă pơtho ăn kơ ba tôch kơ phăl, bônh hlôh vao kơna ba jei jei chăm hloi dôm tơdrong pơm hla bơar lơ̆m kmăi kmŏk lơ lou”.

Tơ̆ Hơnih bơ̆ jang pơm hla bơar tơring Ea Rô̆k, lơ̆m mĭnh năr đei tŏ sĕt hloh 18 ‘nu đoàn viên bơ̆ jang, tơgŭm ăn kon pơlei pơm hla bơar kiơ̆ lơ̆m kmăi kmŏk. Lăp lơ̆m hloh 1 khei tơlĕch jang, khul hlôi đei vă jê̆ 40 ‘nu đoàn viên hlôi bơ̆ jang pơvih pơvăn ăn kon pơlei pơm đei 150 hô sơ yĭch vŭ kŏng, 200 hla bơar rơneh, iŏk ŭnh om, tơbăt lôch răm, atŭm kơ hrĕng hla bơar chư̆k thư̆ tơmơ̆t lơ̆m kmăi kmŏk.

Mŏ Ngô Bảo Ngọc, đoàn viên vang bơ̆ jang tơgŭm djru tơ̆ ou tơbăt, lơ̆m mĭnh năr đei lơ kon pơlei năm pơm hla bơar. Lơ bơngai ‘noh bơngai kon kông tim gan băt nơ̆r yuăn, tim mă đei tai khoan đinh yanh kơ loăi 2, đei ‘măng ưh kơ đei điên thoăi hơgei dăh mă tim mă băt trong vă pơm hla bơar lơ liơ. “Nhôn hlôi pơtho tơbăt ăn kon pơlei năm truh hơnih kŏng an tơring Ea Rô̆k vă pơm đinh yanh păng pơtho ăn kon pơlei chih hla bơar lơ̆m kmăi tinh dăh mă lơ̆m điên thoăi kơ Hơnih bơ̆ jang vei lăng kon pơlei tơring”.

Ưh khan tơgŭm djru lăp hơdrô̆ hơnih bơ̆ jang, rim khul hơdruh tơdăm năm jang oei năm trŭh tơ̆ rim koeng, năm truh rim ŭnh hnam, mă kăl dôm ŭnh hnam hơdro po, bơngai ‘lŏ kră, bơngai kon kông vă pơrô̆ pơrôp, kai tơmơ̆t ư̆ng yŭng kơsô̆, pơtho ăn kon pơlei iŏk yoa kmăi kmŏk trư̆k tuyên tơgŭm ăn tơdrong hơrih sa păng pơm hla bơar ou to. ‘Nhŏng Ninh Tiến Đạt, Kơ iĕng Kơdră chĕp pơgơ̆r Đoàn tơring Quảng Phú, dêh char Dak Lăk tơbăt:“Đoàn viên hơdruh tơdăm năm truh tơ̆ hnam chă pơtho ăn kon pơlei kai tơmơ̆t rim ư̆ng yŭng kla kon jên răt yoa tơmam drăm điên tư, pơm hla bơar thuê̆, pơm hla bơar trư̆k tuyên, đơ̆ng noh tơgŭm ăn kon pơlei băt hơdăh trong bơ̆ jang khul kơdră chĕp pơgơ̆r tơring 2 kâp adoi nhen chă pơm hla bơar trư̆k tuyên rơvơn hloh”.

Đơ̆ng blŭng khei 7 truh dang ei, mưh trong jang khul kơdră chĕp pơgơ̆r tơring ƀar kâp đei tơlĕch jang, Hơnih Đoàn dêh char Dak Lăk hlôi hơvơn đei 131 khul hơdruh tơdăm bơ̆ jang tơgŭm tơplih kơsô̆, “Đĭ đăng kon pơlei hŏk pơhrăm kơsô̆”, kiơ̆ yok đơ̆ng rim khul bơ̆ jang tơplih kơsô̆ pơlei pơla hơdrol ou ki. Rim đoàn viên, hơdruh tơdăm hơdrin kơtang bơ̆ jang iŏk yoa kmăi kmŏk kơsô̆ lơ̆m rim tơdrong jang. Đơ̆ng noh hlôi tơgŭm jơnei mơjĭt rơbou ‘nu kon pơlei tơ̆ rim tơring choh jang sa, tơring groi kông, tơring hơtăih yăih, tơgop pơm ăn kon pơlei pơla băt hlôh găh kmăi kmŏk kơsô̆ păng băt pơm hla bơar kiơ̆ kmăi kmŏk kơsô̆.

Kiơ̆ đơ̆ng ‘nhŏng Lương Minh Tùng, Bí thư Đoàn dêh char Dak Lăk, khei năr ou kơnh, khul đoàn viên gô hơnơ̆ng đei hŏk pơhrăm kơtang găh tơdrong bơ̆ jang, iŏk jang hơnăp jang tơgŭm djru khul kơdră chĕp pơgơ̆r păng kon pơlei lơ̆m tơdrong bơ̆ jang tơplih kơsô̆.“Xơkơ̆t hơdăh iung jang tơgŭm djru ‘noh hơnih bơ̆ jang pơm hla bơar tơ̆ rim tơring, phương, kơ yuơ lơ loh kơna khul joăt jang kăl lơ hloh. Hơnih Đoàn dêh char jei hlôi pơgơ̆r pơtho ming dôm tơdrong tơplih kơsô̆. Tơchĕng hơlou truh ou kơnh ‘noh, Khul kơdră chĕp pơgơ̆r đoàn dêh char jei gô hơvơn rim bơngai joăt jang păng kơdră chĕp pơgơ̆r rim hơnih bơ̆ jang, pơtho tơbăt dơ̆ng dôm tơdrong jang kăl tơ̆ Hơnih bơ̆ jang pơm hla bơar vă rim boăl khul jang tơm băt hơdăh, gơ̆h jang hloh dơ̆ng”.

Hăm hơnăp jang kơtang păng ƀônh hlôh vao lơ̆m jang kmăi kmŏk, khul jang đoàn viên, hơdruh tơdăm Dak Lăk tŏk bŏk roi năr roi jing gơng tơroh kloh klĕch tơdrong jơnei ƀar păh kon pơlei hăm khul kơdră chĕp pơgơ̆r tơring lơ̆m iung jang tơ iung pơjing khul kơdră chĕp pơgơ̆r kmaiw kmŏk kơsô̆, tơpôl kơsô̆, yak truh trong tơlĕch ăn kơ yuơ tơdrong hơrih sa sơđơ̆ng rơvơn hloh păng gơh hơgei hloh ăn kon pơlei pơla.