'Nou jĭ tơdrong pơgơ̆r jang đơ̆ng đe kơdră kơpal dêh char Đăk Lăk ah 'măng Pơma đam tơbăt 70 sơnăm năr juăt jue kơ anih jang vei hơlen kơ teh đak gah dôm tơdrong khop kơyuơ Anih jang Kon kông păng Tơdrong khop dêh char Đăk Lăk pơgơ̆r. Dêh char Đăk Lăk dang ei đei hloh 3,3 triu kon pơlei, lơ̆m noh đei hloh 720.000 bơngai kiơ̆ dôm tơdrong khop hăm vă jê̆ 4.000 bơngai pơgơ̆r dôm tơdrong khop; hloh 270.000 'nu bơngai kon kông. Jơ̆p dêh char đei hloh 700 tơring kiơ̆ dôm tơdrong khop; 1.300 tơring khop păng tơring hơkŭm ou to.

Sơkơ̆t hơdah, kiơ̆ dôm tơdrong khop jĭ tơdrong pơm sơđơ̆ng đon bơnôh hăm kon pơlei, tŏk bŏk yak hơdoi hăm kon pơlei, ƀok Nguyễn Thiên Văn, Phŏ Kơdră Anih jang vei lăng kon pơlei dêh char Đăk Lăk pơgơ̆r Anih jang Kon kông păng Tơdrong khop pơtoi jang tơnăp tơdrong tơgŭm ăn anih jang kơpal, jơnŭm pơgơ̆r tơring lơ̆m tơdrong pơgơ̆r pơm kiơ̆ tơchơ̆t gah dôm tơdrong khop đơ̆ng Đảng păng teh đak, mă kăl noh Luơ̆t tơdrong lui, tơdrong khop; hơmet hơtŏk tơdrong pơtho bơngai jang gah dôm tơdrong khop, sek tơlang tơnăp dôm tơdrong kon kông, dôm tơdrong khop đơ̆ng tơring hloi.