Ƀok Nguyễn Thành Công, Kơdră Khŭl pơgơ̆r tơdrong jang “Bơ̆jang yua kơ tơpôl”, tơroi, kiơ̆ đơ̆ng lăng hơlen, anih jang lăng ƀôh Kon Chiêng ‘noh jĭ xăh pơmat tat hloh kơ dêh char Gia Lai hăm hloh 90% ‘noh bơngai kon kông. Khŭl năm jang tơgŭm ‘mên mơnat ‘meh vă jing tơley tơgoăt, păr ang jơhngơ̆m đon vang tơgŭm truh hăm kon pơlei.

 “Nhôn ƀôh đei tơdrong hơrih sa kơ kon pơlei tơring ‘nâu tôch kơ kăl tơdrong tơgŭm păng nhôn hlôi tơchơ̆t rơih ‘nâu jĭ hơnih năm truh. Tơdrong mă nhôn ƀôh hơdăh hloh ‘noh jĭ dôm hnam hơdrơ̆l, dôm trong teh mă kon pơlei athei rok năm rim năr. Nhôn lăng ƀôh đei dôm gre athei kơdâu hăm lôp chô̆ glang vă năm klĕch đei dôm trong krang păng hơƀơ̆r hlŭt, ‘noh jĭ tơdrong nhôn tơchơ̆t bơ̆n athei năm truh hơnih ‘nâu”.

Tơdrong jang hlôi tơlĕch jang lơ tơdrong bơ̆jang hơdăh ‘lơ̆ng, akŏm lơ̆m dôm tơdrong jang pơgang, pơtho pơhrăm păng tơgŭm oei sa nhen: khăm jĭ, pơtho tơƀôh jơhngơ̆m pran păng asong đĕch pơgang ăn kơ 500 ‘nu kon pơlei. Et hơtŏk “Thư viện tơgŭm truh tơ̆ hnam trưng”, asong hla ar hŏk, hla ar chih, tơmam hŏk pơhrăm, hơbăn hŏk ‘nao; sir 2 hơ lŭng đak kuay, pơm 1 pôm hnam ‘mêm mơnat... Akŏm jên 850 triệu hlak jên.

Oh Hà Hoàng Phú, oei tơ̆ plei Thương, hŏk tro lăm 6D, hrĭ jơhngơ̆m tơroi:“Ĭnh đei khăm jĭ, asong pơgang păng đei iŏk tơmam, ĭnh bơnê kơ đe duch , đe ma lơ̆m khŭl năm jang tơgŭm ‘mêm mơnat.”

Tơdrong jang “Bơ̆jang yua kơ tơpôl” ‘măng mă 31 hlôi sơng đei 130 ‘nu bơngai vang jang. Oh Bùi Thị Minh Phương, sinh viên Đại học Y Dược pơlei tơm Hồ Chí Minh akhan, ‘măng năm âu gô jing 1 tơdrong lăng ƀôh hơnat vă hiơt ăn kơ dih, lăng ƀôh đei jơhngơ̆m mơnat, 1 jơhngơ̆m đon ‘lơ̆ng tôch kơkăl ăn tơdrong jang đơ̆ng kơdih lơ̆m dŏng hơmet bơngai jĭ.

“Tôch kơ mơnat ƀơ̆t năm 12 jơ, klĕch dôm jăl trong ưh kơ tơhnă, kông krang mă gơh truh tơ̆ hơnih khăm jĭ. Ĭnh ƀrơ̆k mơnat, ‘meh hơnhăk lơ pơgang păng tơdrong mêm truh hăm kon pơlei”.