Pơih xă dôm trong jang đei yoa đơ̆ng Tơdrong jang 8 tơ̆ tơring kon kông păng groi kông
Thứ bảy, 06:00, 12/07/2025 VOV/Dơ̆ng tơblơ̆ VOV/Dơ̆ng tơblơ̆
VOV4.Bahnar - Tơring kon kông păng groi kông kơ teh đak bơ̆n hơnơ̆ng jĭ tơring oei tơjră hăm lơ tơdrong nol găh đon tơchĕng ưh hơtŏ băl kơplăh drŏ kăn hăm drŏ nglo, tơdrong iŏk unh om hrôih, oei băl hơgăm, teh dong lơ̆m hnam tơnŏ păng ưh đei lơ jên, tơmam vă jang tŏk. Kơplăh ‘nŏh, Tơdrong jang 8 – "Pơm hơtŏ băl kơplăh drŏ kăn hăm drŏ nglo păng sek tơlang ‘lơ̆ng dôm tơdrong kăl hăm drŏ kăn păng đe hơioh" găh tơdrong jang tơm kơ teh đak atŏk tơiung mŭk drăm, tơpôl tơ̆ tơring kon kông păng groi kông đơ̆ng 2021-2030, tơƀôh hơdăh tơdrong gĭt kăl vă jang tŏk. Hăm dôm tơdrong đei yoa hlôi iŏk đei, tơdrong hơtŏk ‘lơ̆ng păng pơih xă tơring hlôi jing 1 tơdrong jang gĭt kăl vă pơm tơplih ‘lơ̆ng rim tơdrong.
Video Player is loading.
Current Time 0:00
/
Duration 0:00
Loaded: 0%
Progress: 0%
Stream Type LIVE
Remaining Time -0:00
 
1x

 

 

Tơdrong jang 8 hlôi tơlĕch lơ trong jang rơgei ‘lơ̆ng, lăp hăm rim tơring, hơnhăk ba lơ tơdrong ‘lơ̆ng hơiă tơ̆ tơring kon kông păng groi kông.

Hăm trong roi tơbăt, pơhlôh đon, dôm Grŭp jang "Bơngai chĕp kơ̆l tơdrong tơplih" păng "Grŭp roi tơbăt lơ̆m tơpôl" hlôi jing dôm bơngai năm hơdrol vă roi tơbăt, pơm hơtŏk đon hlôh vao. Kiơ̆ đơ̆ng dôm jơ hŏk hôp, pơm tông, roi tơbăt hăm 2 nơ̆r (Nơ̆r Yoăn hăm nơ̆r kon kông), dôm tơdrong tơroi tơbăt găh hơtŏ băl kơplăh drŏ kăn hăm drŏ nglo, tơdrong ưh ‘lơ̆ng đơ̆ng iŏk unh om hrôih, oei băl hơgăm păng teh dong lơ̆m hnam tơnŏ hlôi mât truh tơ̆ rim tơpôl. Pơtih gia nhen tơ̆ Plei Chùa (Quảng Trị) dăh mă Huổi Ho (Điện Biên), tơdrong iŏk unh om hrôih păng oei băl hơgăm hlôi jur lơ, lơ oh drŏ kăn đei tơtă athei oei dơ̆ng tơ̆ hnam trưng.

Oh Hồ Thị Bảy tơ̆ plei Chùa, xăh Hiếu Giang, Quảng Trị tơroi: “Jơ roi tơbăt năr ‘nâu tơgŭm ăn oh hlôh vao roi lơ, kŭm nhen băt trong vei lăng kơdih kâu. Băt trong veh hơtăih dôm tơdrong kơnê̆ lơ̆m tơpôl vă ba gơ̆h arih xa ‘lơ̆ng ƀiơ̆. Kiơ̆ đơ̆ng noh, oh kŭm băt sơnăm păh iung tôch kăl hŏk pơhrăm, ưh kơsĭ vă hưch băl ôh. Oh hơpơi ‘mĕh kiơ̆ đơ̆ng jơ roi tơbăt năr ‘nâu gô hơnhăk ba tơdrong đei yoa ưh lăp hơdrô̆ oh đĕch mă ăn lơ bôl boăl nai hai”.

Hăm tơdrong tơgŭm găh trong arih xa, pơjao hơnăp jang mŭk drăm, Tơdrong jang hlôi pơjing đei lơ grŭp jang xa hơdai, trong asong tŏk iŏk jên pơlơh băl, pơtho pơhrăm tơdrong jang păng chă anih răt iŏk tơmam jang đei. Đơ̆ng tơdrong rong nhŭng găm, rong bơbe, pơtăm ‘long pơgang, truh tanh brai vai khăn dăh mă chă tơmang lăng lơ̆m tơpôl, đe drŏ kăn hlôi đei dơ̆ng jên khei vă pơ ‘nhŏ ăn tơdrong arih. Tơdrong ‘nâu ưh lăp tơgŭm pơm tơjur tơnuh hin, pơm hơtŏk tơdrong arih xa đĕch mă oei pơm hơtŏk anih dơ̆ng, nơ̆r pơma đơ̆ng bơngai drŏ kăn lơ̆m unh hnam păng tơpôl dơ̆ng.

Trong jang tơgŭm ăn drŏ kăn păng đe hơioh đei tơdrong arih xa tôch pơmat tat: Tơdrong jang "Mĕ hơđơ̆ng", tơgŭm jên hŏk ƀŏng, the ƀao hiêm pơgang dăh mă man "Hnam ‘mêm mơnat" hlôi jing anih gơnang tôch hơđơ̆ng ăn dôm bơngai pơmat tat. Dôm tơdrong jang ‘nâu tơƀôh hơdăh jơhngâm đon ‘lơ̆ng tôch pơneh, tơgŭm ăn drŏ kăn păng đe hơioh đei dơ̆ng tơdrong ‘lơ̆ng vă gơ̆h yak hlôi tơdrong pơmat tat, mât hơdai păng jang tŏk.

Trong jang pơm hơtŏk đon gei, hlôh vao ăn kăn ƀô̆ Khul păng tơpôl: Dôm lăm pơtâp pơhrăm găh trong roi tơbăt, vei lăng tơdrong jang, păng tơmât yoa kơmăy kơmŏk hlôi pơtho ăn khul kăn ƀô̆ păng dôm bơngai đei bưng ai vei kơjăp, tưk tơiung păng pơih xă rim tơdrong jang. Tơdrong đĭ đăng khul grŭp drŏ kăn tơ̆ dôm xăh sơlam Lào Cai đei răt hơmet tôm kơmăy tĭnh, kơmăy in ‘nŏh jĭ 1tơdrong pơtih gia ăn tơdrong tơplih hăm kơmăy sô̆ lơ̆m tơdrong jang khul, pơm hơtŏk tơdrong đei yoa mưh bơ̆ jang.

Vă dôm trong jang đơ̆ng Tơdrong jang 8 hơnơ̆ng đei yoa ‘lơ̆ng păng păr ang truh jơ̆p tơring, kiơ̆ yă Nguyễn Thị Minh Hương, Phŏ Kơdră vei lăng Khul drŏ kăn Việt Nam, rim khul grŭp athei hơnơ̆ng hơlen năng, chih hơdăh dôm tơdrong pran ‘lơ̆ng, tơdrong tam mă ‘lơ̆ng đơ̆ng rim trong jang. Đơ̆ng noh, hơmet pơ ‘lơ̆ng tơdrong hơgăt păng hla ar pơtho tơƀôh, pơjing tơdrong ‘lơ̆ng vă pơih xă sư. ‘Ngoăih kơ ‘nŏh, athei pơtho mă hơlen găh tơdrong vei lăng, roi tơbăt, dăr hơlen ăn kăn ƀô̆, mă loi jĭ tơring tơrang. Athei hơtiŏk hơnăp jang tơm đơ̆ng tơpôl, pơm ‘lơ̆ng ăn đe drŏ kăn păng kon pơlei gơ̆h kơchăng vang jang lơ̆m rim tơdrong, đơ̆ng chih pơjing đon tơchĕng truh tơlĕch bơ̆ jang păng vei kơjăp tơdrong jang xa. Tơdrong adrin đơ̆ng tơpôl ‘nŏh jĭ tơdrong tôch gĭt kăl vă rim trong jang gơ̆h bơ̆ jang kơjăp đunh.

Yă Nguyễn Thị Minh Hương tơroi dơ̆ng: “Găh hơlen năng atŭm ‘nŏh nhôn ƀôh, mưh đĭ jing trong pơgơ̆r jang hrơ̆ch ‘lơ̆ng đơ̆ng Trung ương truh tơring bơih, ‘nŏh dôm tơring athei ‘moi kiơ̆ tơdrong jang ‘nŏh păng pơgơ̆r bơ̆ jang mă rơgei vă gơ̆h đei yoa păng lăp tơ̆ yăn âu hăm dôm tơring. Lơ tơdrong hơgăt jang đei lơ hlŏh nơ̆r hơgăt, kŭm đei lơ tơdrong tơplih ‘lơ̆ng găh đon tơchĕng, trong jang xa đơ̆ng kon pơlei, đei hloi đe drŏ kăn păng drŏ nglo, jô̆ hloi bơngai ‘lŏ kră păng đe ‘lơ ‘lơ̆p, kiơ̆ đơ̆ng noh vang tơgop sek tơlang đei 1,2 tơdrong gĭt kăl lơ̆m tơpôl păng hơtŏk tơdrong pơm hơtŏ băl kơplăh drŏ kăn hăm drŏ nglo tơ̆ tơring kon kông păng groi kông.”

Tơdrong jang 8 ưh lăp 1 trong jang kơplăh dang ei đĕch mă oei jing 1 trong jang đunh đai, gĭt kăl vă hơtŏk tơdrong hơtŏ băl kơplăh drŏ kăn hăm drŏ nglo, pơm hơtŏk anih dơ̆ng ăn drŏ kăn păng vang tơgop ăn tơdrong jang tŏk pran kơjăp đơ̆ng tơring kon kông păng groi kông. Hăm tơdrong pơm hơtŏk tơdrong 'lơ̆ng păng pơih xă dôm trong jang, dôm kơjă kăp gĭt đơ̆ng hơtŏ băl kơplăh drŏ kăn hăm drŏ nglo gô đei păr ang, lang xă truh tơ̆ jơ̆p pơlei pơla, tơgŭm ăn đe drŏ kăn hơtŏk đon rơgei, hlôh vao, vang pơjing 1 tơdrong arih xa ning mônh kơnh 'lơ̆ng hơiă păng hơnŭk hơnoa ăn teh đak.

VOV/Dơ̆ng tơblơ̆

Viết bình luận

TIN CÙNG CHUYÊN MỤC

Video