Tŏk bŏk vei kon oei hơmet tơ̆ Hnam pơgang Đa khoa Tơring Tây Nguyên, ‘nhŏng Y Vy Ktul, oei tơ̆ plei Chăm, apŭng Krông Ana roi tơbăt, lơ̆m 1 khei sư đei 2 ‘nu kon ƀĭch tơ̆ hnam pơgang yua kơ jĭ grŏnh ngăl. Tơdrong hli bơngơ̆t roi tih yua kơ 2 ‘nu mon nai tơ̆ hnam tă kơ tam đei ƀet vắc xin bơ̆ng jĭ grŏnh ngăl.

"Ĭnh ưh kơ băt pơm lơ liơ, năm khăm ‘noh đe akhan đei yuh lĕch tơ ƀroih tơƀrônh, năm tơ̆ âu mă băt jĭ grŏnh. Ƀôh đe mon ƀĭch tơ̆ hnam pơgang thoi âu ‘noh dang ei mă băt truh vắc xin jĭ grŏnh, pă jor athei năm ƀet ăn kơ mon hloi. Dang ei năm tơ̆ hnam pơgang ‘noh oei tơ̆ hnam hiong jơ hiong tơdrong jang, ƀlă kơ ‘noh mon jĭ ĭnh kŭm hli, tơ tăm.”

Ƀak si Trần Thị Thúy Minh, Kơdră khoa hơmet hơ ioh jĭ, Hnam pơgang Đa khoa tơring Tây Nguyên, roi tơbăt, dang ei jĭ grŏnh tŏk bŏk tơpoh lanh tôch kơ hrĕnh păng lơ hơioh đei jĭ ăl. Lơ̆m kơ sô̆ hloh 60 ‘nu bơngai jĭ tŏk bŏk hơmet tơ̆ hơnih ăn oei hơdrô̆, tôch kơ lơ hơioh đei ƀôh jĭ tơ̆ tơsoh, jĭ măt păng jĭ klak chroh.

“Jĭ grŏnh ‘noh jĭ 1 lơ̆m dôm tơdrong jĭ tôch kơ krê hơmơt păng tơpoh lanh tôch kơ hrĕnh, sư tơpoh hrĕnh hloh kơ jĭ COVID-19. Mă lei, 1 tơdrong pŭn ‘noh găh lơ jĭ grŏnh hlôi ƀet vắc xin ‘noh vă đĭ đăng ưh kơ đei jĭ. ‘Nâu ‘noh jĭ tơdrong jĭ gơh tang găn hăm vắc xin. Tơdăh ưh kơ đei ƀet bơ̆ng vắc xin đei tơpoh ‘noh jĭ gô tôch kơ al păng kơsô̆ bơngai jĭ ăl lơ”.

Ƀok Hoàng Hải Phúc, Kơdră Anih vei lăng tơdrong jĭ jăn dêh char Đắk Lắk, roi tơbăt, tơ̆ hơnăp tơdrong jĭ grŏnh roi tŏk, anih jang pơgang hlôi tơlĕch jang lơ trong jang vă vei lăng jĭ jăn. Lơ̆m noh hơtŏk loi dơ̆ng dăr hơlen pơrang jĭ, ƀet tôm, ƀet ‘mong vắc xin ăn kơ hơioh tam đei ƀet tôm, hơmet ‘lơ̆ng cham char tơ̆ dôm hơnih đei bơngai jĭ păng tŭn pran roi tơbăt vă hơtŏk ‘lơ̆ng đon hlôh vao đơ̆ng kon pơlei.

“Nhôn hlôi jang tơgŭm ăn Anih vei lăng jang pơgang vă tơlĕch jang tơdrong jang tang găn jĭ grŏnh lơ̆m tơring, lơ̆m noh đei ƀet jĭ grŏnh, rubela păng athei dôm hnam pơgang kơpal năm bơ̆jang tơdrong joăt jang, đang kơ ‘noh tŭn hrĕnh tơdrong jang ƀet bơ̆ng. Mă loi ‘noh jĭ bơ̆n hơtŏk loi dơ̆ng tơdrong jang roi tơbăt truh rim tơring hơtăih hơtŏ, tơring kon pơlei kon kông jang kiơ̆ vă ba kon oh lơ̆m bơngai oei ƀet bơ̆ng vă năm ƀet bơ̆ng.”

Kiơ̆ kơ Anih tang găn tơdrong jĭ (Anih tơm vei lăng găh jang pơgang), đơ̆ng blŭng sơnăm truh dang ei lơ̆m teh đak chih iŏk hloh 52.000 ‘nu jĭ grŏnh, lơ hloh ‘noh jĭ dôm dêh char păh Pơbăh. Đơ̆ng rŏng hla ar athei đơ̆ng Thủ tướng lơ̆m khei 11/2024 găh hơtŏk loi dơ̆ng tang găn jĭ grŏnh, lơ tơring chih măt ƀet vaccxin mă lei oei tam mă lơ. Thim dơ̆ng ‘noh, tơdrong pơgơ̆r ƀet bơ̆ng nhen lĕ lăp đei anih jang pơgang mơ̆t jang đĕch, dôm anih jang nai ưh kơ vang jang lơ, ưh kơ krao hơvơn đei kon pơlei truh ƀet bơ̆ng. Kiơ̆ kơ Tiên si, ƀak si Hoàng Minh Đức, Kơdră Anih tang găn tơdrong jĭ, dang ei oei 1,2 tơring đei tơdrong pơhiơ̆ tơdrong jang tang găn jĭ:

“Tơdrong ‘nâu ƀơm truh găh lơ ‘noh tơdrong jang pơgơ̆r ƀet vắc-xin, vă khan kĭ ăn trong tơlĕch jang, hơmet ăn jên jang, răt bơ̆n tơmam kơmăy kơmŏk.... Hrei ‘nâu kơsô̆ bơngai jĭ tŏk lơ ‘noh jĭ yua đơ̆ng ƀet hiơ̆ hloh kơ tơdrong tơpoh lanh đơ̆ng jĭ âu.”

Hmă hmă, đơ̆ng rŏng kơ ƀet bơ̆ng 2 giĕng hơioh gô đei pran. Lơ̆m tơdrong jĭ grŏnh oei đei ƀôh krê hơmơt nhen hrei ‘nâu, mĕ ƀă kăl kơ ba hơioh đơ̆ng 6 khei truh 10 sơnăm tam mă đei ƀet dăh mă ƀet tam mă tôm vaccine jĭ grŏnh năm ƀet. Mưh mĕ ƀă ưh kơ ƀlŏk đĭ ƀet bơ̆ng ăn kơ hơioh tôm dăh tam mă ‘noh athei ƀet dơ̆ng yua kơ vaccine jĭ grŏnh ưh pơm pơrăm ăn jơhngơ̆m pran kơ hơioh.