Ƀlep ƀât lêh 30/4 păng 1/5 âu tơ̆ Đà Lạt – Lâm Đồng pơgơ̆r lơ tơdrong joh ayŏ kơ dŏ xoang ‘lơ̆ng hơiă, nhen thi mă hơtuch Dalat Best Dance Crew 2025, Tơdrong joh hơri hơxoang “Teh đak jing mĭnh” tơbăt 50 sơnăm tơblăh iŏk rơngei Tơring Pơbăh, pơjing đei 1 teh đak kơjăp ‘lơ̆ng, lơ show hơri hơxoang đơ̆ng dôm bơngai hơri hiôk đei ư hơnhang ang hơnhăk… ‘nŏh jĭ dôm tơdrong vang tơgop sơng đei lơ bơngai truh tơmang lăng, pơdơ̆h ngôi.

Kiơ̆ kơsô̆ chih jô̆ đơ̆ng Anih chă tơmang lăng dêh char Lâm Đồng, Đà Lạt – Lâm Đồng sơng đei dang 240.000 ‘nu tơmoi truh tơmang lăng, pơdơ̆h ngôi ƀât pơdơ̆h lêh, tŏk hlŏh 14% pơting hăm khei âu sơnăm 2024. Lơ̆m noh, tơmoi đơ̆ng teh đak đe đei dang 14.000 ‘nu bơngai, tŏk 75%, păng hlŏh 160.000 ‘nu tơmoi tep pơdơ̆h hloi tơ̆ âu, tŏk 23% pơting hăm khei âu sơnăm sơ̆.