Sơnăm ‘nâu, dêh char Kon Tum đei hlŏh 5.300 ‘nu hŏk tro chih măt thi tốt nghiệp THPT. Vă hơtŏk tơdrong ‘lơ̆ng mưh ôn ƀai, hlŏh 220 ‘nu thây kô apinh năm pơtho tơgŭm dơ̆ng ăn đe hŏk tro. ‘Moi kiơ̆ dôm tơdrong thi pơlong năng păng tơdrong ôn thi đơ̆ng khei 3 truh dang ei, hŏk tro đei klăih song pơm 3 grŭp: grŭp hŏk ưh gan gơh, grŭp hŏk lăp ai păng hŏk hơgei. Tơdrong ôn ƀai đei pơgơ̆r lăp hăm rim grŭp vă tơgŭm ăn đe oh hŏk rơgei ƀiơ̆, pơm ƀai ‘lơ̆ng ƀiơ̆.

Anih vei lăng pơtho pơhrăm dêh char Kon Tum hlôi pơjing khul dăr lăng tơ̆ dôm tơ̆ hnam trưng vă roi tơƀôh, atŭm hăm ‘nŏh athei Khul thây kô vei lăng hơlen năng tơdrong ôn thi rim jơ, rim giĕng. Dôm hnam trưng oei hơlen năng rim tơdrong hŏk pơhrăm ôn ƀai đơ̆ng đe hŏk tro păng hơlen năng kiơ̆ khei tơdrong ôn rim môn. ‘Nâu jĭ tơdrong adrin tôch ‘lơ̆ng vă pơm hơtŏk kơsô̆ hŏk tro thi đou păng hơtŏk kơsô̆ điêm lơ̆m ‘măng thi THPT truh âu kơnh.