Ƀai mă hơtuch năr ‘nâu, nhôn tơroi truh 1 jơhngâm đon yak hơdoi, vang tơgŭm băl bơ̆ jang đơ̆ng rim anih jang chinh trĭ păng kon pơlei. Ưh lăp hơmet anih bơ̆ jang, tơdrong yak vih vât, anih oei xa, hŏk pơhrăm đĕch mă đei hloi jơhngâm đon ‘mêm băl vă yak tŏk lơ̆m 1 jăl ‘nao dơ̆ng. “Mĭnh jơhngâm yak hơdai, pôm trong jang tŏk” ‘nŏh jĭ jơhngâm đon oei păr ang tôch ‘lơ̆ng đơ̆ng Tây Nguyên truh tơ̆ tơring Tơter đak dơsĭ găh Pơbăh tơring Tŏk bŏk, jĭ kơ̆l ƀai mă hơtuch kơ dôm ƀai chih âu.

Dôm năr ‘nâu, tơdrong jang tơ̆ Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng Lâm Đồng nhen roi hơiă. Jĭ tơring đei iŏk pơm Anih jang ‘nao đơ̆ng rŏng kơ tơmât hơdai hăm Đắk Nông păng Bình Thuận, Lâm Đồng oei hăt hơmet rim tơdrong vă sơng dang 2.000 ‘nu kăn ƀô̆ đơ̆ng 2 dêh char truh jang. Ƀok Trần Thanh Hoài, Phŏ Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng Lâm Đồng ăn tơbăt, anih jang oei hơmet rim tơdrong vă sơng dơ̆ng 150 ‘nu bơngai truh jang: “Đe kăn ƀô̆, bơngai jang kơ teh đak tŏk jang tơ̆ âu, đe ‘nhŏng oh bơ̆ jang tơ̆ anih âu vă tơgŭm chă hnam trưng, anih oei xa mă lăp, jê̆ anih jang. Yoa đei kăn ƀô̆, bơngai jang đei hloi klo kăn kiơ̆ năm tơ̆ dêh char Lâm Đồng ‘nao ‘nŏh đe kon mon kŭm yak kiơ̆. Mă đơ̆ng dôm tơdrong ‘nâu ưh đei chih hơdăh lơ̆m hla ar ră mă lei ‘nâu jĭ tơdrong mât 1 ƀơ̆r đon, tơgŭm băl, pơngơ̆t ăn ‘nhŏng oh đơ̆ng dôm dêh char boăl kŭm nhen pơngơ̆t ăn kơdih bơ̆n ‘năi”.

Kiơ̆ tơdrong  tơmât hơdai 3 dêh char Lâm Đồng, Bình Thuận păng Đắk Nông, khul kơdră pơgơ̆r dêh char Lâm Đồng ‘nao đei hlŏh 5.900 ‘nu kăn ƀô̆, bơngai jang. Tơchĕng adrol 80% kơsô̆ bơngai đei hơmet ăn anih bơ̆ jang tơ̆ plt Đà Lạt. Lơ̆m noh vă jê̆ 2.000 ‘nu kăn ƀô̆, bơngai jang đơ̆ng 2 dêh char Bình Thuận păng Đắk Nông. Ƀok Nguyễn Ngọc Phúc, Phŏ Kơdră vei lăng kon pơlei dêh char Lâm Đồng ăn tơbăt: Đơ̆ng rŏng kơ hlŏh 3 khei hơmet, dôm trong hơmet hnam oei ăn kăn ƀô̆, Anih bơ̆ jang, gre chơ ba vih vât kŭm đei Lâm Đồng tơlĕch jang hrơ̆ch ‘lơ̆ng: “Nhôn oei dăr hơlen tơ̆ dang 10 anih vă pơm anih ăn kăn ƀô̆ đơ̆ng dôm dêh char truh bơ̆ jang. Anih oei, hnam teh đak ăn bơngai jang oei kŭm đei hơlen năng, pơm hơmet vă ăn ‘nhŏng oh đei anih oei xa sơđơ̆ng ‘lơ̆ng. Dêh char oei apinh Khul kơdră teh đak đei trong tơgŭm jên hăm đe kăn ƀô̆ âu vă đe kăn ƀô̆ đơ̆ng tơring nai truh bơ̆ jang gơ̆h sơđơ̆ng jơhngâm”.

Kŭm hăm Lâm Đồng, tơdrong hơmet ming kŭm đei bơ̆ jang tôch ‘lơ̆ng tơ̆ Đắk Lắk. Dêh char hlôi tơlĕch trong jang atŭm, đơ̆ng tơdrong hơmet anih oei, hnam trưng ăn kon hơ ‘lơ̆p kăn ƀô̆; gre vih vât păng hơmet tơdrong jang ăn 1.000 ‘nu kăn ƀô̆ đơ̆ng dêh char Phú Yên. Yă Cao Thị Hòa An, Bí thư Đảng dêh char Phú Yên tôch lăp đon hăm dôm trong jang mă Đắk Lắk oei tơlĕch jang: “Mưh đơ̆ng Phú Yên tŏk tơ̆ âu ‘nŏh tơpă mơ̆n ƀôh bơ̆n nhen thoi 1 unh hnam. Nhôn đơ̆ng Phú Yên tŏk tơ̆ âu đei lơ tơdrong tơchĕng mă lei kŭm hơnhăk ba ƀĕnh tơdrong hưch hanh, băt ‘mêm băl păng hơmĕng kơ 1 dêh char tih vă bơ̆n gơ̆h đei anih dơ̆ng tôch tơgăl, lăp hăm tơdrong hơmĕng đơ̆ng kăn ƀô̆, đảng viên, kon pơlei păng lăp hăm đon lui đơ̆ng Trung ương”.

Tơmât hơdai dêh char, xăh, kăt tơjur khul bơngai jang… dang ei ưh lăp đon adrin yak hlŏh pơmat tat đơ̆ng rim kăn ƀô̆, jĭ hơnăp jang păng tơdrong hơmet tôch ‘lơ̆ng đơ̆ng khul kơdră dôm dêh char đĕch mă oei jing nơ̆r pơtho tôch rơgei đơ̆ng Trung ương kŭm hăm tơdrong tơgŭm tôch pơnĕh đơ̆ng kon pơlei. Rim nơ̆r pơma đơ̆ng bơngai tăh hla tơ̆ dôm ‘măng tơƀâp, hơnơ̆ng tơƀôh đon tơgŭm păng hơpơi ‘mĕh Trung ương kŭm hăm dôm dêh char bơ̆ jang mă ‘lơ̆ng tơdrong ‘nâu, atŭm hăm ‘nŏh pơma hơdăh tơdrong gĭt kăl đơ̆ng tơdrong jang kăn ƀô̆: “Hơmet ming khul kơdră pơgơ̆r đơ̆ng Trung ương truh tơring tôch lăp đon kon pơlei. Kăn ƀô̆ tơ̆ tơring kŭm nhen kon pơlei tôch lui kơ Đảng, Teh đak. Hơpơi 'mĕh tơ̆ hơnăp kơnh Đảng, Teh đak jang đei 'lơ̆ng tơdrong 'nâu”.

Tơmât hơdai kiơ̆ Trong Hơlĕch – Pơmât gô tơgŭm ăn Tây Nguyên đei đak dơsĭ, Tơring găh Pơbăh kơ tơring Tŏk bŏk đei bri kông, tơmât hơdai jơhngâm pran, hơmet kơjăp tơdrong pơvei jŏh ayŏ kơdŏ xoang păng kon bơngai. Dôm dêh char Lâm Đồng, Đắk Lắk, Bình Định, Quảng Ngãi hlôi tơƀôh đon pơhnŏng tôch ai lơ̆m tơdrong hơmet rim tơdrong vă pơm ‘lơ̆ng ăn Khul kơdră pơgơ̆r ‘nao bơ̆ jang rơgei, đei yoa mưh sơng iŏk rơbâu ‘nu kăn ƀô̆ đơ̆ng Kon Tum, Gia lai, Phú Yên, Đắk Nông păng Bình Thuận. Dôm tơdrong pơmat tat athei yak hlŏh lơ̆m tơdrong jang kăch mang âu, tŏk bŏk jing unh čhông lăng măih, pơmat tat pơlong năng jơhngâm đon kăn ƀô̆! Yak hlŏh dôm tơdrong pơmat tat blŭng a, dôm dêh char gô đei tơdrong hiôk hian, ‘lơ̆ng ƀiơ̆ vă kŭm hăm băl yak mât lơ̆m chăl jang tŏk iung ‘nao.

Link ƀai 1:

https://vov4.vov.vn/bahnar/kotong-ang-lom-topol-thoi-su-xa-hoi/lo-bai-mang-toplih-kotang-pom-kotoei-khul-bo-jang-unh-long-maih-hrat-hrin-long-kang-bo-486858.vov4

Link ƀai 2:

https://vov4.vov.vn/bahnar/kotong-ang-lom-topol-thoi-su-xa-hoi/bai-2-unh-chong-lang-maih-kio-dong-dom-mang-chor-kong-poih-trong-adrol-so-486918.vov4