Năr hơtuch giĕng tơ̆ Hnam joh ayŏ tơpôl kơ pơlei O Ngol, xah Ia Vê, apŭng Chư Prông (dêh char Gia Lai) ang jơva tơdra chĭng chêng atŭm hăm nơ̆r pơma hơhiĕk hăm nơ̆r hơri brông Jarai, hăm tơdrong vang jang đơ̆ng tôm kon pơlei păng đe ngê̆ nhơ̆n, kră pơlei lơ̆m xah. Jĭ bơngai hơvơn akŏm đei khul drăkăn lơ̆m pơlei O Ngol atŭm vang jang vă vei răk tơƀăk mong um ai joh ayŏ kon kông, pơmai Siu H’Biáo tơroi: “Kon pơlei Jarai adoi đei minh ƀar ƀai hơri đei chih nơ̆r 'nao vă hơ-'nguơ̆u kơ rim bơngai nuih mơng lơ̆m khei năr tơblah vang. Pơtih nhen ƀai "Ơ đe mih pơla đe ma pơlei"; ƀai "Hơ̆k kơdơ̆k - chơt hơ-iă năr đei jơnei rơngei"; dôm ƀai hơri hơ-'nguơ̆u kơ tơdrong jang kăch mạng đơ̆ng đe mih ma hơdrol sơ̆. Mă kăl dôm ƀai hơri kiơ̆ tơdra hơri mă mih ma 'lŏ sơnăm hơri hơ-'nguơ̆u kơ Ƀok Hô chơng trong kăch mạng. Tơdrong jang dang ei ưh đei tơnap tap nhen hơdrol ki; đơ̆ng đei điê̆n thoăi thŏng minh, ba băt yua hăp noh hăp ƀônh hăm tơdrong pơm jang. Pơtih nhen ba pơjing đei grŭp jang, ah kăl noh tơroi păng pơđăp tơdrong jang ƀônh hiôk hloh”.

Kră pơlei Siu Jo chơt hơ-iă: O Ngol 'noh pơlei pơm kăch mạng sơ̆, kon pơlei hơnơ̆ng tơguăt tơguăl, lui kơjăp hăm tơdrong pơgơ̆r đơ̆ng Đảng. Hloh 10 sơnăm kơ ou, O Ngol hơnơ̆ng đei iŏk hơnăn pơlei hơrih hơgei lơ̆m dêh char. Lơ̆m noh, hơdah noh dôm tơdrong jang vei răk tơƀăk mong dôm kơjă joh ayŏ juăt jue. Kră pơlei Siu Jo tơroi: “Inh ƀôh sô̆ chơt kơlih đei đe sơnăm mơlôh pơtoi pơhrăm tôn chĭng chêng păng vei răk tơƀăk mong joh ayŏ juăt jue mă yă ƀok pơsư̆ ăn. Gah pơlei O Ngol đei 3 khul tôn chĭng chêng 'noh: khul chêng đe tơdăm, khul chêng đe hơ-ioh păng khul chêng bơngai 'lŏ sơnăm... Đei hloi ngê̆ nhơ̆n Ama Nga păng Thôn trơng atŭm tôn chĭng chêng hăm 'nhŏng oh. Kơdih po inh kră pă đei pơngơ̆t kơ đon bơih, kơlih hlôi đei khul chêng mơlôh pơdjoi, ning mônh kơnh 'lŏ kră vih hăm yă ƀok hlôi đei chĭng chêng, kơlih chĭng chêng kăp gĭt hloh lơ̆m tơdrong hơrih đon lui nhen: pơdong grong ƀŭ, et brư̆ pơsat păng dôm tơdrong et xa kăp gĭt nai kơ pơlei pơla adoi đei kăl truh tơdra chĭng chêng”.

Pơlei O Ngol đei jê̆ 120 unh hnam, hăm jê̆ 500 măt bơngai, mă lơ noh kon pơlei Jarai. Pơlei hlôi đei jơnei tơchơ̆t pơjing tơring tơrang 'nao đơ̆ng 7 sơnăm hơdrol ki. Mă kăl, tơdrong pơtoi dôm tơdrong joh ayŏ nhen chĭng chêng, reh brŏ kon kông, hơsuang, hơri brông jing tơdrong ưh gơh kơƀah lơ̆m tơdrong hơrih kon pơlei Jarai.

Hăm ƀok Siu Huỳnh-Ƀĭ thư Chi ƀô̆, Kơdră thôn O Ngol, hơri brông păng tôn chĭng chêng hlôi hram đunh lơ̆m sĕch pham bơih: “Tơpôl roi năr roi hơtŏk tơ-iung kiơ̆ tơdrong 'nao, athei kơdou kiơ̆ tơdrong hơrih, mă lei kơdih inh adoi hơdrin pơhrăm hơring brông, hơri dôm ƀai hơri juăt jue kơ kăch mang hăm nơ̆r Jarai. Hăm sơnong jang Ƀĭ thư Chi ƀô̆ adoi jang hloi Thôn trơng, inh hơnơ̆ng tơchĕng athei pơm thoi yơ vă pơtrŏ hăm sơnong jang đei pơjao. Inh hơnơ̆ng yuk hơlou rim tơdrong jang, hơrih thoi yơ mă tơgăl vă kon pơlei lăng tơ̆ noh păng atŭm băl hơdrin noh ba athei jang mă tơnăp, trŏ khôi luơ̆t noh pơma kiơ kon pơlei adoi mơ̆ng kiơ̆ păng jang kiơ̆. Tơdrong đei jơnei đơ̆ng blŭng jăl jang truh dang ei, pơlei nhôn pơm yă kiơ adoi năm hơlou, mă kăl noh tơdrong jang pơjing tơring tơrang 'nao”.

Ƀok Siu Khlo, Ƀĭ thư Đảng uy xah Ia Vê, apŭng Chư Prông ăn tơbăt: Pơm kiơ̆ Tơchơ̆t kơsô̆ 12 đơ̆ng Anih jang Kơpal Tĭnh uy Gia Lai gah pơjing tơring tơrang 'nao lơ̆m tơring kon kông, đơ̆ng hơtuch sơnăm 2018, pơlei O Ngol hlôi đei jơnei dôm tơchơ̆t tơlĕch; păng jing minh lơ̆m dôm tơring tơrang 'nao gơh hơgei kơ dêh char: “Pơlei O Ngol pơm kiơ̆ tơchơ̆t tơlĕch “Teh đak păng kon pơlei atŭm pơm jang”, kon pơlei hlôi pơih trong tơ̆ pơlei pơla rơgoh 'lơ̆ng. Ƀar pah jih trong pơlei adoi đei unh tơ̆k hơdah noh pă đei bơih tơdrong klĕ tơtông, tơdrong pơm yoch lơ̆m tơpôl. Hnam oei bot 'lơ̆ng, pơgar hnam đei pơga, đei pơtăm 'long jơk, lơ̆m pơgar đei tơm kaphê, tiu... Dang ei lơ unh hnam hlôi đei hnam man kơjăp 'lơ̆ng, răt tôm tơmam drăm choh jang xa nhen gre choh, gre kŏng nŏng; oei gre hon đa 'noh tơtă gre 'nao ngăl. Mă kăl, pơlei đei hnam akŏm joh ayŏ kơ pơlei pơla, đei khul chĭng chêng păng khul reh brŏ kon kông nhen goong, chĭng klơk. Đe ngê̆ nhơ̆n hơmet chêng păng kon pơlei băt tơgĭt păng vei răk joh ayŏ kon kông po kơdih”.

Pơlei O Ngol, xah Ia Vê, apŭng Chư Prông (dêh char Gia Lai) hrei ou jĭ um ai hơgei kơ minh pơlei tơring tơrang 'nao lơ̆m tơring kon kông. 'Nou jĭ anih hơdah lơ̆m tơdrong vei răk tơƀăk mong joh ayŏ kon kông lơ̆m khei năr tơdrong hơrih 'nao ang bang ou. Hăm tơdrong vang jang đơ̆ng tôm anih jang chĭnh trĭ, sơnong jang kơ đe kră pơlei, bơngai đei kon pơlei lui yom, păng tơdrong pơdjoi đơ̆ng đe sơnăm mơlôh, hlôi tơgop vei răk kơjă joh ayŏ kon kông, atŭm hăm noh hơtŏk tơdrong jang pơjing tơring tơrang 'nao kiơ̆ pơkăp kơjăp sơđơ̆ng, gơh hơgei păng ƀenh kơ um ai joh ayŏ kơdih.