
Oei sut đak măt ăn kon kơpal giơng jĭ, năng muh măt kon ƀĕnh rơka ngăl, tơpang ti nhen vă hĕch đĭ păng athei kăt lê̆ hơnglou yŏng păng hơ nglou plŏi, jơhngâm mŏ Trần Thị Thu Hằng tơ̆ xăh Tam Giang, apŭng Krông Năng, dêh char Đắk Lắk tôch ơh. Đei đe ƀak si tơ̆ Khoa hơmet pơ ‘lơ̆ng hơkâu jăn, Hnam pơgang Đa khoa tơring Tây Nguyên dŏng hơmet, rơka đei sut, sĭt hơmet bơih, mă lei tơdrong kon pơm ngôi kơmlăi đôh âu oei hơnơ̆ng đei lơ̆m jơhngâm đon hli hlơt tơ̆ bơngai mĕ đĕch: “Ƀât đôh đe dŏng tơgŭm chơ năm tơ̆ hnam pơgang, krao điên thoăi ăn mĕ, kơplăh âu bơngai mĕ kŭm hơngơ̆t pơ̆k iung. Ƀak si khan tơpang ti mon athei kăt hŭt lê̆ 2 tŏ hơnglou, ƀât âu mĕ jĭ jơhngâm pă băt dang yơ, mĕ ưh băt pơm thoi yơ vă gơ̆h tơplih ăn kơ kon.”

Mŏ Nông Thị Tiên, mĕ mon Trần Nhật Phong, tơ̆ xăh Đắk Gla, apŭng Đắk Mil, dêh char Đắk Nông, kŭm đei tơdrong ơh sơ ‘ngon lơ loh ‘năi. Phong hăm boăl sư pơm kơmlăi, đơ̆ng rŏng kơ ‘nŏh chĕp brŏk tơ̆ hnam vă văn hơmet. Yoa chơ ngoi hơ ‘yuih, mon iŏk hơdrĕng tơ̆ gŏ pang lăh, pơih unh vă chơngoi hrĕng, jing đei tơdrong đôh tih: “Inh băt tơdrong krê hơmơt đơ̆ng kơmlăi ‘năi, inh hơnơ̆ng tơtă ăn kơ kon lê̆ pơm ngôi ră mă lei sư ưh kơmơ̆ng. Năr kơmlăi đôh, năng mưh măt kon măh čhưu hloi, hli tơpă, ưh ê sư jĭ rơka ăl thoi noh.”
Rơka tơ̆ ti păng muh măt đe oh gơ̆h klăih tơlir kiơ̆ khei ‘năr, mă lei tơdrong jĭ lơ̆m jơhngâm ‘nŏh hơnat vă gơ̆h hiơt hiong. Hăm đe oh, kơmlăi đôh ưh lăp jĭ rơka, pơtŏk hmă đĕch, mă oei đei lơ tơdrong ơh sơ ‘ngon lơ̆m jơhngâm đon, ƀơm truh tơdrong arih, tih vơ̆. Mon Hoàng lơ̆m dôm năr hơmet tơ̆ hnam pơgang, ‘nŏh pơtơm ƀôh tơdrong krê hơmơt đơ̆ng kơmlăi: “Kon năng Tiktok păng apinh răt tôm kơchơ̆t đơ̆ng rŏng kơ ‘nŏh tuh hrâu sư vă pơm. Kon tuh ‘măng mă 3 ‘nŏh ưh ê sư đôh. Ƀak si ôp, sut rơka, ƀet pơgang tôch jĭ, kon ƀôh tôch kơlĕl hăm tơdrong pơm ngôi kơmlăi âu.”
Oei ‘nâu jĭ jơhngâm đon mon Phong ƀât oei ĕnh tơdrong jĭ rơka yoa đơ̆ng kơmlăi đôh: “Dang ei ti tôch jĭ păng pơ ‘ngiĕh, pơtŏk lơ anih, tơ̆ muh măt tôch jĭ ‘năi. Oh tôch ơh yoa oh ưh đei băt tôm tơdrong krê hơmơt đơ̆ng chơngoi.”

Ƀak si Nguyễn Minh Trực, Kơdră vei lăng Khoa hơmet pơ ‘lơ̆ng hơkâu jăn, Hnam pơgang Đa khoa tơring Tây Nguyên, tơroi, dôm tơdrong đôh hơnơ̆ng kơ đei lơ̆m pơyan pơdơ̆h he păng ƀât Têt, kơsô̆ hơioh jĭ rơka tôch lơ. Rim sơnăm, Khoa iŏk hơmet ăn dang 20 ‘nu bơngai jĭ rơka yoa đơ̆ng pơm ngôi kơmlăi. Dôm rơka đơ̆ng kơmlăi đôh tôch hơmơt, đơ̆ng pơtŏk muh măt, kơtĕch hơnglou ti truh tơ̆ măt tol. Dôm tơdrong pơtŏk đơ̆ng kơmlăi roi hơmơt hlŏh dơ̆ng, yoa sư gơ̆h pơm tơlĕch lơ tơdrong răm truh lơ̆m hơkâu jăn, athei răih hơmet hơnơ̆ng vă gơ̆h klăih: “Kơmlăih đôh đa đei rơka ăl tôch dêh. Đei lơ bơngai athei kăt hŭt hơnglou ti, thoi noh lơ liơ ti pă ‘lơ̆ng thoi blŭng a, jing pơm jo jăn ăn kon mon truh đĭ jơhnơr arih. Găh unh hnam, tơpôl athei pơngơ̆t truh kơ đe kon mon, yoa dôm tơdrong thoi noh sư pơm tơlĕch tơdrong răm tôch kơnê̆ lơ̆m jơhngâm đon.”
Jĭ rơka đơ̆ng kơmlăi đôh ưh lăp tơdrong krê hơdrô̆ tơ̆ 1 unh hnam, dăh mă hơdrô̆ tơ̆ dêh char Đắk Lắk đĕch mă tơdrong ‘nâu ƀơm truh jơ̆p tơpôl. Tơdrong tơroi kơ dôm bơngai răm, dôm bơngai athei chĭu pŭ jĭ rơka âu, jĭ nơ̆r khan hơdrol tôch rơđăh vă hơtŏk đon hlôh vao păng đei trong tang găn veh hơtăih; rim bơngai athei kơchăng vei lăng kơdih kâu păng bơngai lơ̆m hnam vă huei đei tơdrong ơh sơ ‘ngon, jĭ jơhngâm yoa đơ̆ng kơmlăi đôh âu./.
Viết bình luận