Khoa hơmet bơngai jĭ ăl kơ Hnam pơgang pơlei tơm Buôn Ma Thuột hlôi hơmet ăn 6 tŏ giơng ƀĭch kơ tă păng 5 tŏ giơng kâp kư̆u vă sơng bơngai jĭ lơ̆m năr Têt. Ƀak si Trần Thanh Quý, Phŏ Khoa Hơmet bơngai jĭ ăl roi tơbăt: “Khoa hlôi đei tơdrong hơmet ăn 1 khŭl trư̆k ‘noh đei 1 ƀak si păng 2 điều dưỡng păng trư̆k 1 măng 1 năr vă hơmet pơ ‘lơ̆ng hăm tơdrong đei ƀôh, mă loi ‘noh jĭ dôm tơdrong đei ƀôh pơnhŭl tơmam sa kŭm nhen gre tơ̆m preh băl đa đei ƀôh lơ̆m năr Têt”.

Hnam pơgang Đa khoa tơring Tây Nguyên, hăm hơnăp jang jĭ hnam pơgang hơmet jĭ tuch luch kơ tơring Tây Nguyên, hơnơ̆ng hơmet tôm hăm dôm bơngai kâp kư̆u jĭ ăl păng đei ƀôh kăl. Ƀak si Nguyễn Doãn Sơn, Phŏ Kơdră Khoa Kâp kư̆u, roi tơbăt, lơ̆m năr Têt, bơngai jĭ mơ̆t hơmet gô tŏk hloh 50% pơting hăm năr hmă, mă loi ‘noh jĭ dôm bơngai jĭ đơ̆ng gre tơ̆m preh băl, tơdrong jĭ găh plei nuih păng pơ̆k. “Nhôn gô hơtŏk loi dơ̆ng trư̆k kơdră chĕp kơ̆l, hơtŏk loi dơ̆ng 1 khŭl trư̆k kâp kư̆u ngoại, 1 khŭl trư̆k jang păng 1 khŭl trư̆k hơmet hiă vă mưh đei bơngai jĭ mơ̆t lơ dăh mă gre tơ̆m preh băl lơ ‘noh gô krao jang hloi. Hơdai hăm ‘noh gô tơlĕch jang 1 khŭl trư̆k tơ̆ Khoa, tơdăh đei krao jang nhôn gô ăn 1 ‘nu ƀak si, 2 ‘nu điều dưỡng năm kâp kư̆p tơ̆ ‘ngoăih hnam pơgang hloi.”

Kŭm hăm roi tơbăt bơngai jang, tơmam păng pơgang, Hnam pơgang Đa khoa tơring Tây Nguyên kŭm lăng kăl truh tơdrong vei lăng găh tơmam drăm păng jơhngơ̆m đon hăm dôm bơngai jĭ oei tơ̆ hnam pơgang lơ̆m năr Têt. Ƀak si Nguyễn Ngọc Thịnh, Phŏ Kơdră vei lăng Hnam pơgang, roi tơbăt:

“Đĭ đăng dôm khoa hơmet jĭ păng lăm hơlen lăng bơ̆n pham, siêu âm, phĭn âu to nhôn tơtă ăn ‘noh jĭ ‘nĕ kơ ăn lơ bơngai jang pơdơh năm tơ̆ chă ngôi tơ̆ hơtăih vă akŏm lơ̆m tơdrong trư̆k jang vei lăng ăn bơngai jĭ ‘lơ̆ng hloh, hơdrô̆ hăm khoa kâp kư̆p păng hơmet bơngai jĭ ăl athei trư̆k prăt măng prăt năr. Lơ̆m năr Têt âu ‘noh nhôn pơgơ̆r kơchơ têt ‘măn ăn bơngai jĭ mơmat tat, pơtih gia nhen tơgŭm phe, đak kho, đak toh, sĭk vă bơngai jĭ đei sa Têt hiôk chơt”.

Ưh khan lăp hơdrô̆ dôm hnam pơgang dêh char, dôm hnam pơgang apŭng kŭm hlôi hơmet ăn tôch kơ hơlen ăn năr Tết Nguyên Đán. Ƀak si Lê Thị Thủy, Kơdră vei lăng Hnam pơgang apŭng M’drak, roi tơbăt: “Khŭl kơdră vei lăng hnam pơgang athei đĭ đăng dôm khoa, hnam pơgang xăh lơ̆m tơdrong hơmet ăn dôm tơdrong jang vei sơđơ̆ng ‘lơ̆ng hloh ăn vei lăng bơngai jĭ tơ̆ pơ đĭ 2 hơnih, hăm Hnam pơgang apŭng ‘noh kơchăng tơlĕch jang hrơ̆ch dôm tơdrong jang ƀơm truh pơgang, tơmam đang kơ ‘noh klăih song trư̆k, bơngai jang vă vei sơđơ̆ng ăn dôm tơdrong jang lơ̆m kâp kư̆u bơngai jĭ hơdrol, lơ̆m păng đơ̆ng rŏng Tết Nguyên Đán.”

Lei lăi thoi noh mơ̆n, tơ̆ Hnam pơgang apŭng sơlam Ea Súp, ƀak si Nguyễn Viết Hữu, Kơdră vei lăng Hnam pơgang apŭng kŭm pơma hơdăh: “Nhôn ưh kơ song pơdơh phep hơtuch sơnăm păng Têt, vei sơđơ̆ng bơngai jang tôm klăih song trư̆k jang, bơ̆jang kiơ̆ khăm hơmet jĭ pơyua ăn kon pơlei lơ̆m năr Têt”.

Anih jang pơgang Đắk Lắk hlôi tơlĕch trong jang hơmet ăn đơ̆ng dôm hnam pơgang dêh char truh dôm hnam pơgang apŭng, vei sơđơ̆ng tơdrong jang khăm hơmet jĭ păng kâp kư̆u. Ƀak si Nguyễn Hữu Vũ Quang, Phŏ Kơdră Anih vei lăng jang pơgang tơroi: “Anih vei lăng jang pơgang hlôi đei hla ar gơih kơ đĭ đăng dôm hnam pơgang hơmet ăn bơngai jang, tơmam, hơmet ăn bơ̆n pơgang tôm đơ̆ng hnam pơgang apŭng truh dêh char. Anih jang pơgang hlôi hơmet tôm vă sơng iŏk đĭ đăng dôm bơngai jĭ kăl kơ truh tơ̆ dôm hnam pơgang vă hơmet lơ̆m năr Têt. Trư̆k jang pơgang nhen trư̆k vei lăng tơring sơlam”.

Hăm tơdrong hơmet ăn ‘lơ̆ng păng tôch kơ tơnăp đơ̆ng khŭl y ƀak si, anih jang pơgang Đắk Lắk hlôi hơmet tôm tơ jră hăm rim tơdrong đei ƀôh lơ̆m năr têt. Mă đơ̆ng kâp kư̆u hăt hot dăh mă vei lăng bơngai jĭ, đe y ƀak si oei hơnơ̆ng jang tơnăp, hơnhăk ăn 1 năr Têt sơđơ̆ng păng hiôk ăn kon pơlei.