Tơdrong bơ̆jang tơpăt, tơtĕnh păng iŏk đei jơnei yak blŭng lơ̆m hơmet pơ ‘lơ̆ng hla ar bơ̆jang. Kon pơlei chhôk ‘nă, khŭl kơdră chĕp kơ̆l kơchăng, hơmet tôm ăn năr bơ̆jang tơpă đơ̆ng ‘năr 1/7. Tơ̆ khŭl bơ̆jang 1 ‘măng phường Ea Kao, tơmơ̆t hơdai đơ̆ng xăh Ea Kao păng phường Ea Tam, mă đơ̆ng đei lơ kon pơlei truh pơm bơ̆n hla ar bơ̆jang, khŭl sơng iŏk, hơmet pơ ‘lơ̆ng hla ar bơ̆jang ‘lơ̆ng hiôk; dôm hla ar đei hơmet ‘lơ̆ng tơtĕnh hăm jơhngơ̆m đon pơvih pơvăn gơh hơgei.

Tơ̆ phường Thành Nhất ‘nao, tơdrong bơ̆jang pơlong lăng tơdrong jang kŭm pơgơ̆r hiôk ‘lơ̆ng. Kon pơlei chhôk ‘nă ƀơ̆t ƀôh dôm tơdrong tơplih rơđăh rơđong lơ̆m tơdrong pơvih pơvăn păng đei yua hơmet pơ ‘lơ̆ng tơdrong jang. Hơdai hăm pơlei tơm Buôn Ma Thuột, tơdrong jang tơ̆ xăh găh dêh char kŭm đei pơlong lăng tơ̆ dôm apŭng kơ Đắk Lắk, tơgŭm kon pơlei hiôk, ƀônh pơm bơ̆n hla ar bơ̆jang.