‘Măng tơmât hơdai âu, Phú Yên đei 971 ‘nu kăn ƀô̆ năm tơ̆ Đắk Lắk, lơ̆m noh đei 876 ‘nu kơdră vei lăng Lăm jang păng bơngai juăt jang; 95 ‘nu kăn ƀô̆ đei kơchư̆k đơ̆ng Phŏ kơdră chĕp kơ̆l tŏk tơ̆ kơpal, găh dôm bơngai đei chă hơmet ăn hnam oei kiơ̆ tơdrong hơgăt.

Đơ̆ng rŏng kơ lêh roi tơbăt pơjing dêh char ‘nao lơ̆m ‘năr 30/6, dôm anih jang gô đei bơ̆ jang tơpă. Mă đơ̆ng oei đei lơ pơmat tat găh anih oei, tơdrong arih xa, bơ̆ jang păng hŏk pơhrăm kơ kon hơ ‘lơ̆p, mă lei hăm đon tơnăp păng kơchăng, lơ kăn ƀô̆ blŭng a lĕch đơ̆ng Phú Yên tŏk tơ̆ Đắk Lắk hlôi mât hơdai tôch hrĕnh, vang akŏm jơhngâm yoa tơdrong jang tŏk pran kơjăp đơ̆ng dêh char ‘nao ƀât chăl pơih blŭng.

Kơhrĕng kang ƀô̆, bơngai jang kơ dêh char Gia Lai hlôi năm truh hơnih jang 'nao tơ̆ pơlei tơm Quy Nhơn, dêh char Bình Định, pơtơm tơdrong jang kiơ̆ pơkăp jăl hơtŏk tơ-iung 'nao kơ dêh char Gia Lai. Đơ̆ng tong hơnê̆ khei 6, Hơnih jang Tĭnh uy dôm dêh char Gia Lai păng Bình Định hlôi đei hla bar pơdrơ̆ng: lơ̆m 'măng mă 1, asong pơhlom 50% lơ̆m pơhlom 1.800 kang ƀô̆, bơngai jang kơ dôm hơnih jang năm truh hơnih jang hanh chĭn 'nao.

Kơsô̆ kang ƀô̆ oei lăi noh pơtoi pơm jang tơ̆ hơnih jang 2 tơ̆ pơlei tơm Pleiku vă vei sơđơ̆ng tơdrong jang hanh chĭn tơ̆ dêh char Gia Lai (so) truh đĭ sơnăm 2025. Đơ̆ng rŏng sơnăm 2025, dôm hơnih jang ou gô pơtruh bơngai jang trŏ ƀlep, kiơ̆ kơ tơdrong đei ƀôh păng tơdrong pơm jang tơ̆ Quy Nhơn. 

Đĭ đăng Khul kơdră chĕp kơ̆l Đảng ƀô̆ dêh char Kon Tum jăl XVI, hlôi đei măt tơ̆ dêh char Quảng Ngãi vă pơgê ‘năr 30/6 vang pơm lêh roi tơbăt khul kơdră pơgơ̆r păng Anih vei lăng ‘nao. Hăm 40 xăh, phường ‘nao đơ̆ng dêh char Kon Tum so hơtăih kơ anih jang tơ̆ dêh char ‘nao Quảng Ngãi dang 200km, kơdră chĕp kơ̆l 2 dêh char Kon Tum păng Quảng Ngãi drơ̆ng nơ̆r pơjing 10 anih pơih pơdăh tơ̆ 10 apŭng, plt kơ dêh char Kon Tum so vă đe kăn ƀô̆ 40 xăh, phường ‘nao vang truh hăm tơdrong gĭt kăl âu kiơ̆ trong pơih trư̆k tuyê̆n.