Hơnơ̆ng pơgơ̆r Hop akŏm hăt hot ‘măng mă 9, Kuô̆k hô̆i jăl 15, năr ou, năr 15/2 rim kơdră tang măt pơma dơnuh tơ̆ Hnam hop akŏm găh tơdrong vă pơjing Khul kơdră chĕp pơgơ̆r tơring (hơmet ming); Tơdrong jang tơmơ̆t dơ̆ng găh atŏk tơ iung mŭk drăm-tơpôl sơnăm 2025 hăm trong tơlĕch ăn tŏk 8% năm tơ̆ lơ; Trong tơlĕch jang tơmơ̆t jên jang tơdrong vă jang ming man trong gre treng Lào Cai - Hà Nội - Hải Phòng; Trong pơjing Tơdrong Tơchơ̆t kơ Kuô̆k hô̆i jang pơlong năng mĭnh ƀar trong jang, trong tơgŭm djru gĭt kăl vă atŏk tơ iung trong gre treng tơring kơdrơ̆m pơlei tơm Hà Nôị, pơlei tơm Hồ Chí Minh. Tơdrong vă jang atŏk tơ iung trong gre treng tơring kơdrơ̆m pơlei tơm Hà Nôị, pơlei tơm Hồ Chí Minh, hlôi đei Hơnih tơm Chinh trĭ pơdrơ̆ng kiơ̆, vă atŏk tơ iung trong gre treng tơring kơdrơ̆m truh sơnăm 2045, hăm akŏp kon jên vă iung jang kơ Hà Nội ‘noh dang 62 ty dolar Mi păng pơlei tơm Hồ Chí Minh dang 67 ti dolar Mi. Tơdrong tpơm ƀơ̆t măt đei Hà Nội hăm pơlei tơm Hồ Chí Minh tơlĕch ăn ‘noh truh sơnăm 2035 tơmơ̆t jang đei 17 jăl trong, akŏp trong kơjung hơtăih 752 km, sơđơ̆ng 35-50% chă chơ tơmoi. Truh sơnăm 2045 tơmơ̆t jang dơ̆ng 7 jăl trong, hăm 4 jăl trong akŏp hơtăih dơ̆ng 355 km, sơđơ̆ng chă chơ 50-60% tơmoi chă hao. Đơ̆ng ƀôh yan ou tơlech jang rim tơdrong jang trong gre treng tơring kơdrơ̆m khei năr ou ki, rim Kơdră tang măt Kuô̆k hô̆i akhan, tơdrong pơjing trong jang kăl ‘noh kăl hloh. Hà Nội hăm pơlei tơm HCM jĭ tơring tŏk kơtang, jang muk drăm tơm, đei lang să kơtang. Tơdrong pơjing Tơdrong tơchơ̆t kăl vă atŏk tơ iung trong gre treng tơring kơdrơ̆m tơ̆ Hà Nội păng pơlei tơm Hồ Chí Minh tơgŭm kơtang khul jang, pơjing rơvơn ăn ƀar pơlei tơm iung jang jơnei trong tơlĕch jang atŏk tơ iung trong gre treng tơring kơdrơ̆m sơđơ̆ng ‘lơ̆ng rŏ, kơjăp ‘lơ̆ng.