Kiơ̆ đơ̆ng akŏm tam mă tôm, đei lơ kơsô̆ nơ̆r tơgop drơ̆ng lăp păng tơƀôh đon pơdrơ̆ng kiơ̆ lơ hăm tơdrong kăl păng tơdrong tơm hơmet ming Khôi luơ̆t tơm teh đak sơnăm 2013. Tơdrong tơm iŏk đei lơ nơ̆r tơgop đơ̆ng dôm bơngai tang măt ‘noh tơdrong hơgăt tơ̆ Chăl 5 Hơpăng 1 hla ar chih ming Tơdrong tơchơ̆t hơmet ming, tơmơ̆t dơ̆ng chăl 2 Hơpăng 115 kơ Khôi luơ̆t tơm teh đak sơnăm 2013: Hŭt tơdrong apĭnh jet đơ̆ng bơngai tang măt Jơnŭm pơgơ̆r kon pơlei hăm Kơdră Anih sek tơlang kon pơlei, Kơdră Anih dăr hơlen kon pơlei.

Hăm Luơ̆t pơgơ̆r khŭl kơdră tơring hơmet ming, dôm bơngai tang măt drơ̆ng lăp hăm lơ tơdrong đơ̆ng luơ̆t, mă lei akhan, kăl kơ hơnơ̆ng dăr hơlen, hơmet ming dôm tơdrong hơgăt găh hơnăp jang, tơdrong gơh jang hơdăh đơ̆ng Jơnŭm pơgơ̆r kon pơlei, Anih vei lăng kon pơlei, Kơdră Anih vei lăng kon pơlei vă pơm rơđăh hloh trong jang tŭn pran klăih song kơdră chĕp kơ̆l, klăih song tơdrong gơh jang, vei sơđơ̆ng 1 trong trŏ lăp hơnăp jang, tơdrong gơh jang đơ̆ng khŭl kơdră tơring tơ̆ dêh char, xăh.