Pơgê ‘năr 25/6, tơ̆ Quảng Bình, Tổng Bí thư Tô Lâm păng Khŭl bơ̆jang kơ Trung ương hlôi bơ̆jang hăm Khŭl kơdră chĕp kơ̆l Anih jang Đảng dêh char Quảng Bình păng Kơdră chĕp kơ̆l Anih jang Đảng dêh char Quảng Trị găh pơtôch tơlĕch jang bơ̆jang kiơ̆ dôm tơdrong tơchơ̆t, pơtôch đơ̆ng Trung ương păng 1,2 hơnăp jang tơm hơtŏk tơiung mŭk drăm - tơpôl, vei sơđơ̆ng teh đak lơ̆m dêh char Quảng Bình, Quảng Trị. Jơ bơ̆jang pơgơ̆r khei ‘năr 2 dêh char Quảng Bình păng Quảng Trị tŏk bŏk tơlĕch trong jang tơmơ̆t hơdai vă pơjing anih bơ̆jang ‘nao chĕp hơnăn dêh char Quảng Trị. Kiơ̆ athei, dêh char Quảng Trị đơ̆ng rŏng tơmơ̆t hơdai gô đei 78 anih bơ̆jang tơ̆ xăh. Anih bơ̆jang - chĭnh trĭ pơm tơ̆ pơlei tơm Đồng Hới.

Tơ̆ jơ bơ̆jang, Tổng Bí thư Tô Lâm kŭm hăm khŭl bơ̆jang Trung ương mơ̆ng kơdră chĕp kơ̆l dôm tơring roi tơbăt găh tơdrong tơlĕch jang dôm tơdrong tơchơ̆t, pơtôch đơ̆ng Trung ương; tơdrong jang proh hơmet khŭl bơ̆jang kơ tơring đơ̆ng rŏng kơ tơmơ̆t hơdai; kŭm hăm dôm tơdrong athei, apĭnh vă hơmet pơ ‘lơ̆ng pơmat tat, vei sơđơ̆ng đei yua păng tơdrong sơđơ̆ng lơ̆m kơplăh tơlĕch jang.