VOV.Bahnar - ‘Măng ‘mi tih đak lơ̆p âu ki tơ̆ tơring găh Pơbăh kơ tơring Tŏk bŏk păng Tây Nguyên hlôi pơm ăn lơ bơngai lôch răm, đak jroh hoch mŭk tơmam, pơm ăn lơ ŭnh hnam hiong pơgoh, hơioh hơrih hơdrô̆, ưh kơ đei bơngai oei hơdai, pơlei pơla hiong răm đĭ. Hăm tơdrong pơgơ̆r hăt hot đơ̆ng Đảng, Khŭl kơdră teh đak, tơdrong mơ̆t jang đơ̆ng khŭl lĭnh kơpal, Mặt trận Tổ quốc păng dôm khŭl grŭp, kŭm hăm kon pơlei lơ̆m teh đak hlôi tơtom tơgop, tơgŭm kon pơlei tơring đak lơ̆p jăh tơiung ming tơdrong hơrih sa.