VOV.Bahnar - Năr 27/7 rim sơnăm – Năr linh jĭ rơka, Linh lôch tang ăn teh đak – jĭ jơnăr vă đĭ đăng Đảng, đĭ đăng kon pơlei păng đĭ đăng khul linh bơ̆n ƀlŏk hơdơ̆r, ‘mêm bơnê kŏng tih tên đơ̆ng đe linh lôch tang ăn teh đak, đơ̆ng đe linh jĭ rơka, đe Mĕ Việt Nam nuih mơng – dôm bơngai hlôi plang pơyơ̆r đĭ chăl arih ăn tơdrong jang kăch mang ‘lơ̆ng hơiă đơ̆ng hơdrĕch hơdrung bơ̆n. Tơdrong juăt “Nhă đak ƀlŏk kơtu”, tơdrong juăt “tơgŭm ăn bơngai đei kŏng” oei hơnơ̆ng đei chĕp vei păng păr ang đơ̆ng chăl ‘nâu truh chăl to, khŏm pơjing pơlei pơla hiôk sơđơ̆ng, ‘lơ̆ng rŏ, đơ̆ng noh vang tưk tơiung jơhngâm đon ‘mêm kơ teh đak ăn chăl mơlôh hrei ‘nâu hai.