VOV.Bahnar - Sơnăm hŏk ‘nao đĭ hloh giĕng hŏk mă blŭng. Hnam trưng lăm hŏk đĭ sơđơ̆ng, kon oh truh tơ̆ hnam trưng roi năr roi tôm, ‘lơ̆ng. Mă kăl ‘noh, tơ̆ dôm hnam trưng tơring hơtăih hơtŏ, tơring sơlam, tơdrong proh hơmet dơ̆ng hnam trưng lăm hŏk păng tơmơ̆t yua dôm hnam trưng teh đak rong tŏk bŏk pơm dơ̆ng tơdrong hiôk vă hŏk tro kon kông đei hŏk pơhrăm ‘lơ̆ng ƀiơ̆. Mă lei vă kon mon hŏk ‘lơ̆ng, hơdai hăm tơdrong hiơ̆k bơngơ̆t đơ̆ng teh đak, tôch kơ kăl tơdrong vang yak hơdai đơ̆ng unh hnam păng tơpôl pơlung kon oh bơ̆n. “Pơm tông Pơlei pơla ‘meh tơplih ‘lơ̆ng, kon sâu athei hŏk pơhrăm ‘mơ̆i” pơma dơnuh tơdrong ‘nâu.