VOV.Bahnar - Tơ̆ lơ pơlei pơla Tây Nguyên, tơdrong tơgŭm asong tŏk iŏk jên hăm jên cheh tŏ sĕt pơih đei tơdrong hiôk, tơgŭm kon pơlei hơtŏk tơiung jang sa, sơđơ̆ng tơdrong hơrih sa. Mă lei, oei đei 1,2 ŭnh hnam dơnuh hin tam mă pơ̆n tŏk iŏk jên. Tơdrong tơm pơm ăn gah lơ ‘noh yua đơ̆ng tam mă băt trong jang sa, ưh kơ đei hlôh vao jang sa, hli tơrơ ưh kơ pŭn ai păng ưh kơ băt pơm đơ̆ng yơ. Tơdrong ưh kơ pơ̆n kŭm hăm đon tơchĕng “Tŏk iŏk jên hli kơ pŭ dơ̆ng hre” hlôi pơm ăn tơdrong hiôk klăih đơ̆ng dơnuh hin đei hŭt kơchăng hê̆. Pơm tông hơtuch giĕng năr ‘nâu jĭ nơ̆r tơtă pơtruh hăm mih ma duch nă lui ngeh tŏk iŏk jên, ƀrư ƀrư̆ yak tŏk sơđơ̆ng tơdrong hơrih sa.