VOV.Bahnar - Năr ‘nâu 26/4, vă khan ‘năr 10/3 sơnăm Bính Ngọ - kŭm hăm jơ̆p lơ̆m teh đak lăng găh Soi kơ Hùng Vương, tơdrong pơgơ̆r lêh păr ang jơ̆p Tây Nguyên păng tơter đak dơsĭ Nam Trung Bộ hăm lơ tơdrong jang joh ayŏ - chă tơmang lăng ‘lơ̆ng hơiă. Dôm tơdrong jang joh ayŏ tơƀôh kơjă kăp gĭt tơm a, jơhngơ̆m đon tơgoăt tơgoăl păng tơdrong mơ̆t hơdai đơ̆ng “bri kông păng đak dơsĭ”. Pơm tông “Tơm a kơ bri kông păng đak dơsĭ” hơvơn kơmih ma duch nă păng bôl buăl vang mơ̆ng.