VOV4.Bahnar - Man tơgŭm hnam, sut pơđĭ hnam hiăh hiok ưh lăp 1 trong jang gĭt kăl vă vei lăng ‘lơ̆ng tơdrong arih xa tơpôl đơ̆ng Đảng păng teh đak đĕch, mă oei jing đon hơmĕng kơ mĭnh tơdrong arih xa hiôk sơđơ̆ng, ‘lơ̆ng rŏ ăn dôm unh hnam pơmat tat dơ̆ng. Đei tơdrong pơngơ̆t đơ̆ng Teh đak, tơdrong vang tơgŭm đơ̆ng rim anih jang kơpal păng tơpôl kon pơlei, rơbâu tŏ hnam man kơjăp ‘lơ̆ng oei vă tơplih ăn dôm bơbŭng hnam gia, hiăh hiok, tơgŭm ăn kon pơlei đei anih oei xa kơjăp ‘lơ̆ng, jang tŏk mŭk drăm. Pơm tông năr ‘nâu đei hơnăn "Vang tơgŭm man hnam vă sut pơđĭ hnam hiăh hiok" tơƀôh jơhngâm đon ‘mêm băl, tơgŭm băl đơ̆ng kon pơlei dôm hơdrĕch hơdrung tơ̆ Tây Nguyên.