VOV4.Bahnar - Tơdrong tơroi kră sơ̆ “Pơnhan plei gao” tơroi găh klo hơkăn ưh kơ đei hơ ‘lơ̆p, đei yang mơnat đei kon drŏ nglo. Hơkăn lôch, bơngai klo nhơ̆m ơ̆h ol, măt đĭ bơbul mă lei hơdrin jang sa rong ‘me kon hơ ‘lơ̆p. Lăp đơ̆ng rŏng kon đei jing koan apŭng păng iŏk ŭnh om, klo akăn măr sư vei lăng năng tông ƀă tôch tơnăp mă lei kơ yuơ đei jơhngơm ‘mêm kơna iŏk kơđoh plei gao pơm pơnhan ăn kơ ƀă sŏng sa. Gơnơm kon măr sư kơna klo hơkăn ƀok kuan apŭng mă ƀôh hơdăh pơm lơ loh ưh kơ ‘mêm mơnat kơ ƀă. Tơdrong tơroi ou vă pơtho khan ăn kơ bơ̆n mĭnh tơdrong ‘noh, lơ̆m tơdrong hơrih ling lang ‘mêm kơ eng kơ mĕ ƀă, băt vei lăng năng tông mĕ ƀă ‘lơ̆ng hơ iă păng chă jang dôm tơdrong yă kiơ ăn mĕ ƀă lơ̆m khei ‘năr kĕ jang.