VOV4.Bahnar - Tơdrong tơroi kră sơ̆ đei hơnăn “Rơnŭng yang” kơ hơdrung Jrai tơroi găh Tơdăm Hrit hăm yă Pôm hơnuh hin, oei sa gơ̆h găt đei Rơnŭng yang tơgŭm djru đei jing pơdrŏng. Yang tơgŭm djru bơngai dơnuh ‘noh jĭ trong chă tơroi kơ rim hơdrung oei tơ̆ Trường Sơn-Tây Nguyên păng jei jơhngơ̆m đon hơpơi ‘meh vă đơ̆ng kon pơlei kră sơ̆ vă tơdrong hơrih sa hiôk jơnap ƀiơ̆. Tơdrong tơroi ou jei vă pơtho tơbăt ăn kơ bơ̆n tơdrong jang ‘mơ̆i mă đei sa, ‘nĕ chă pơm tơdrong chư̆ kơnê̆ kơnh pơm ăn đei tơdrong răm hăm kơ dih bơ̆n.