VOV4.Bahnar - Tơdrong tơroi kră sơ̆ “Tơdrong tơroi găh chơ kơi Kbŏng” kơ hơdrung Bahnar tơroi găh bre hơdruh tơdăm tơhưch dih băl pă tơpleh veh pă ngiĕr, lơ̆m mĭnh ‘măng năm tơ̆ bri chă sir ƀum nheng, ƀum jur vă tơgŭm ăn ŭnh hnam yak hloh pơngot rơvet kơ yơ lơ sơnăm ưh kơ đei ‘mi jur, bia Phu răm hư̆ yang kơnê̆ rôp. Dăm Bri pŭn ai đei xem bri tơgŭm djru ‘noh Sôk, sơke păng Jơma păng jơhngơ̆m đon nuih mơng đơ̆ng kơdih hlôi dŏng hơrih bia Phu păng hlôi pơjing đei tu đak ro ‘lơ̆ng hơ iă. Thoong đak ro gơ grŭk pơjing đei chơkơi pêng tăk nhen dang ei. Tơdrong tơroi ou vă pơtho khan ăn tơdrong tơhưch dih băl ưh kơ gơ̆h hơleh lê̆ ƀlang tơlang lê̆ ƀiao, mă lei kăl pơvei dih băl mă kơjăp mă đơ̆ng tơƀơ̆p tơnap tap dang yơ ră mălei kĕ yak hloh.