Bơ̆ jang kiơ̆ nơ̆r pơtho đơ̆ng Thủ tướng teh đak găh hơnơ̆ng bơ̆ jang sut pơđĭ hnam hiăh hiok lơ̆m teh đak, truh ‘năr 6/2/2025 dêh char Kon Tum tơlĕch man 369 tŏ hnam, lơ̆m noh man ‘nao 320 tŏ hnam păng pơm hơmet ming 49 tŏ hnam. Lơ̆m dêh char Kon Tum đei 2.752 tŏ hnam hiăh hiok, lơ̆m noh ‘mĕh man ‘nao 2.186 tŏ hnam păng pơm hơmet ming 566 tŏ hnam. Akŏm đĭ đăng jên vă dêh char Kon Tum sut pơđĭ hnam hiăh hiok ‘nŏh hlŏh 141 ti 500 triu păng dang ei dêh char oei ưh kơmăh hlŏh 54 ti 700 triu hlak jên.

Tơdrong tơm pơm ăn dêh char Kon Tum jing ưh kơmăh jên vă sut pơđĭ hnam hiăh hiok ‘nŏh yoa kơsô̆ unh hnam kăl đei man hơmet hnam tŏk 1.214 unh hnam pơting hăm tơdrong jô̆ hơlen blŭng a. Mă hơdăh, jô̆ hơlen blŭng a ki lăp đei 1.538 unh hnam păng hơlen năng đơ̆ng rŏng ‘nŏh đei 2.752 unh hnam oei xa lơ̆m hnam hiăh hiok kăl đei tơgŭm jên man hnam. Kiơ̆ Anih pơgơ̆r sut pơđĭ hnam hiăh hiok kơ dêh char Kon Tum, dang ei jên tơgŭm đơ̆ng Trung ương păng dôm kơsô̆ jên vang tơra tơgop tơ̆ tơring ‘nao mong đei dang 61% kơsô̆ jên kăl đei vă dêh char sut pơđĭ hnam hiah hiok.