Pơma dơnuh tơ̆ khul găh trong vă pơjing Khôi luơ̆t khul bơ̆ jang tơring hơmet ming, rim kơdră tang măt lăp đon hăm trong atŏk kơtang pơjao jang, gơ̆h jang, kơ yuơ ‘nou jing trong hơmet pơ ‘lơ̆ng dôm tơdrong tơhlăk tơhlĭn hrei ou. Khôi luơ̆t ưh kơ gơ̆h sơkơ̆t hơdăh, hơlen hơdăh, mă lei lăp tơchơ̆t rim tơdrong kăl, mưh đei pơjao jang, tơring chiu pŭ tơdrong jang kơdih. Mă lei mưh pơjao gơ̆h jang tôm tong ăn khul kơdră tơring jei đei hloi dôm tơdrong tơtăm găh tơdrong pơm pơgơ̆m. Bơngai tang măt Hoàng Văn Cường, Khul Hà Nội akhan:“Pơchoh ăn trong jang lơ liơ vă veh ver pơgơ̆m pơjĭp, mĭnh lơ̆m dôm trong jang ‘noh kăl đei hloi pơkăp kiơ̆ trong hơdăh, tơpăt, tơblang hơdăh. Ƀơ̆t doh kơnh, dôm kang ƀô̆ iung jang kiơ̆ tơnăp ‘lơ̆ng, trŏ lăp hăm nơ̆r pơma pơtôch 14 kơ Hơnih tơm Chinh trĭ găh pơtrŭt dôm bơngai pơ̆n nơ̆r pơma tơ-‘ngla iung jang hloi mă iŏk đei jơnei”.

Vang pơma dơnuh tơ̆ khul, Tổng Bí thư Tô Lâm pơkă: Iŏk tơdrong lăp đon kơ kon pơlei vă hơlen tơdrong jang keh đang, jang ‘lơ̆ng kơ Khul kơdră chĕp pơgơ̆r Teh đak, khul kơdră chĕp pơgơ̆r tơring. Tơdrong mă ou gô mơ̆ng kiơ̆ lơ̆m trong lăng, trong iung jang trŏ lăp hăm tơplih ‘nao, gơ̆h jang kiơ̆ trong tơlĕch jang đơ̆ng khul kơdră tơring. “Pơm hơtŏk bơ̆ jang ‘lơ̆ng ăn kon pơlei, atŏk kơtang vang iung jang đơ̆ng tơpôl lơ̆m pơm hơtŏk jang ‘lơ̆ng kơ Khul chĕp pơgơ̆r hơmet pơ ‘lơ̆ng tơdrong hơtŏ hơnơ̆ng. Tơdăh ưh kơ lăng truh kon pơlei lei tôch tơnap tap. Kăl pơtrŭt, tơchơt lơ liơ vă jang kĕ đei tơdrong ‘nou. Pơjao gơ̆h jang mă lei trong jang tơgŭm ăn jei tôch gĭt kăl. Đĭ đăng pơjao ngăl lei hiong hiơt hloi trong jang tơgŭm djru, hiong dong hloi hơnăp jang kơ yuơ kon pơlei bơih”.

Ăn tơgop nơ̆r găh Khôi luơ̆t bơ̆ jang Khul kơdră Teh đak (hơmet ming), Kơdră chĕp pơgơ̆r Kuô̆k hô̆i Trần Thanh Mẫn pơma hơdăh trong pơjao gơ̆h jang kơtang ăn Khul kơdră chĕp pơgơ̆r teh đak vă Khul kơdră chĕp pơgơ̆r teh đak tơchơ̆t ‘moi kiơ̆ yan ou jĭ trong kăl vă xek tơlang dôm tơdrong tơhlăk tơhlĭn, tơdrong găn ga vă hơmet pơ ‘lơ̆ng ăn tơdrong atŏk tơ iung. Dôm tơdrong hlôi đei ƀôh yan ou ‘noh xek tơlang hloi. Hăm trong ou, Kơdră chĕp pơgơ̆r Kuôk hô̆i athei, mưh ăn tơgop nơ̆r hơmet ming rim khôi luơ̆t đei ƀơm truh kăl hơnơ̆ng dăr lăng, vă sơđơ̆ng trŏ lăp hăm rim tơdrong tơchơ̆t kơ Khôi luơ̆t tơm Teh đak.“Hăm Khôi luơ̆t bơ̆ jang khul kơdră tơring (hơmet ming) gô pơjao kơtang hloh ăn khul kơdră tơring kiơ̆ trong, tơring tơchơ̆t, tơring chiu pŭ. Hrei ou Kuô̆k hô̆i hlôi tơplih ‘nao trong hơlen pơm Khôi luơ̆t ‘noh Kuô̆k hŏi pơjao kơtang ăn Hơnih bơ̆ jang khul kơdră Kuôk hô̆i. Kơ yuơ trong hop akom kơ Hơnih bơ̆ jang khul kơdră Kuô̆k hô̆i trŏ lăp hloh vă xek tơlang dôm tơdrong kăl. Hăm Kuôk hô̆i lơ̆m khei năr kơnh ưh kơ vei lăng dôm tơdrong tơmơ̆t jên jang, truh hloi Khul kơdră teh đak jei ưh kơ vei lăng vă pơm tơjur kơtang tơdrong apĭnh-asong”.

Mĭnh lơ̆m dôm tơdrong pơkăp pơjao gơ̆h jang ‘noh sơđơ̆ng Thủ tướng Teh đak “Ưh tơchơ̆t rim tơdrong găh hơnăp jang kơ Kơdră dơnơm, kơdră chĕp pơgơ̆r Hơnih bơ̆ jang hăm hơnăp jang vang iung jang lơ̆m Khul kơdră chĕp pơgơ̆r teh đak hăm hơnih jang đei pơjao iŏk vei lăng". Bơngai tang măt Nguyễn Minh Đức, khul pơlei tơm Hồ Chí Minh athei: Tơchơ̆t kăl mă hơdăh tơdrong pơjao gơ̆h jang, pơjao chĕp pơgơ̆r đơ̆ng Thủ tướng teh đak truh rim hơnih tơm, hơnih bơ̆ jang.“Pơjao jang ƀar păh Thủ tướng Teh đak hăm Kơdră dơnơm dăh mă Kơdră chĕp pơgơ̆r hơnih bơ̆ jang ‘noh pơjao tang măt ăn dôm tơdrong yă kiơ? Pơjao ăn Kơdră chĕp pơgơ̆r Hơnih vei lăng kon pơlei dêh char dăh mă pơlei tơm găh lơ̆m Trung ương pơjao tang măt ăn dôm tơdrong yă kiơ? Lơ̆m ou kăl đei pơchoh trong vă đơ̆ng rŏng ou đei Tơdrong tơchơ̆t vă pơtho tơbăt hơdăh. Nhen lĕ hơdrol ou ki, tơring chih pơtruh hla bơar apĭnh, kơ yuơ tim mă băt hơdăh”.

Rim kơdră tang măt akhan, lơ̆m teh đak tŏk bŏk jang kiơ̆ ‘măng iung jang kơtang hơmet ming khul kơdră chĕp pơgơ̆r Teh đak, hăm iung jang tôch tĕnh koăng, kơ yuơ lơ loh tôch kơ kăl pơjing hloi Tơdrong tơchơ̆t pơkăp hơdăh găh hơmet pơ ‘lơ̆ng mĭnh ƀar tơdrong đei ƀơm truh hơmet ming hơnih jang khul bơ̆ jang teh đak, vă pơjing đei trong ‘lơ̆ng jang kiơ̆ hơmet pơ ‘lơ̆ng khul jang hơnih bơ̆ jang kơ rim hơnih bơ̆ jang teh đak tơ̆ Trung ương păng tơring.