‘Ngoăih mĭnh ƀar nơ̆r tơgop găh tơdrong Trong glung 27 hư răm kơtang, đak lơ̆p mĭnh ƀar hơnih mưh đei ‘mi, ưh kơ gan đei kơƀang tơbăt tơdrong hơmơt ăn kon pơlei păng gre kơdou trong ou; tơlei ŭnh hơyuh lơ pơm ăn ŭnh hơyuh ưh kơ gan jăng, ưh sơđơ̆ng ăn tơdrong iŏk yua păng pơm tơlĕch tơmam drăm; rơ̆m rĕk klơ̆m hŭt kư̆ kă pơm ‘mê̆ ‘mach cham char; hơnih tĕch mơdro hơnar sơdrông pơm brai ưh kơ gan ‘lơ̆ng, ưh kơ pơjing đei tơpu pơm hiong răm tôch kơ lơ găh mŭk drăm… Bơngai tăh hla tơring Bình Thạnh, apŭng Đức Trọng lăng kơjăp truh tơdrong hơgrop jing mĭnh dêh char, hơgrop tơring, pơm kơtoei khul bơ̆ jang teh đak, hŭt hơnih hơlam.

Bơngai tăh hla Đinh Công Hoán, thôn Thanh Bình 3, tơring Bình Thạnh, apŭng Đức Trọng, dêh char Lâm Đồng akhan, trong tơlĕch jang hơgrop tơring, dêh char, pơm kơtoei khul bơ̆ jang đei kon pơlei toch lăp đon, hơpơi ‘meh vă. Mă lei lơ̆m khei ‘năr iung ang hơmet ming khul bơ̆ jang kăl rơih đei dôm kang ƀô̆ tơpă hơgei đei jơhngơ̆m đon ‘lơ̆ng, pơma sa rơhao. “Tơdrong hơgrop jing mĭnh vă pơm kơtoei hơnih bơ̆ jang Teh đak, pơm dă ƀiơ̆ tơhoach lơ kon jên jang ‘noh ba lăp đon dêh. Mă lei, vă Khul kơdră ‘nao iung jang jơnei lei bơ̆ jang lăng hơlen tơdrong gơh jang kơ kang ƀô̆ kăl trŏ lăp hăm dôm tơdrong pơkoel păng pơjao ăn ƀlep tơdrong gơ̆h jang vă chĕp pơgơ̆r bơ̆ jang ‘lơ̆ng hloh dơ̆ng. Mĭnh tơdrong dơ̆ng ‘noh bơ̆jang pơtho pơhrăm jơhngơ̆m đon ‘lơ̆ng, tơdrong bơ̆ jang kăl lăng kơjăp, vă tơgăl hăm tơdrong tơlĕch jang chinh trĭ đei tơlĕch ăn”.

Bơngai tăh hla tơring Bình Thạnh, apŭng Đức Trọng, dêh char Lâm Đồng ‘meh vă Kuô̆k hô̆i, teh đak hrôih keh đang hơmet ming, tơ iung pơjing Khôi luơ̆t tơm teh đak, khôi luơ̆t ... vă trŏ lăp hăm tơdrong ‘meh vă atŏk tơ iung ‘nao kơ teh đak, trŏ lăp hăm tơdrong yan ou kơ tơring. Bơngai tăh hla tơbăt jơhngơ̆m lăp đon hăm Trung ương găh pơm kơtoei hơnih jang, tơ iung pơjing khul bơ̆ jang 2 kâp, jang kiơ̆ hơgrop jing mĭnh dêh char, hŭt apŭng ...Mă lei, kon pơlei oei tơtăm găh tơdrong vă hơgrop tơring lơ̆m khei năr truh ou kơnh lơ liơ, pơma tơbăt jơhngơ̆m tơtăm găh tơdrong hơgrop dêh char să dêh hnang,đei tơdrong ưh kơ gan sơđơ̆ng ou to...

Tang măt ăn Khul kơdră tang măt Kuô̆k hô̆i dêh char Lâm Đồng, ƀok Phan Đình Trạc hôn bơnê kơtang dôm tơdrong tơgop tơpăt đơ̆ng bơngai tăh hla. Adoi hôn bơnê dôm nơ̆r tơgop đơ̆ng bơngai tăh hla pơma truh păng athei khul kơdră tơring sek tơlang rim tơdrong mă dêh char kĕ jang. Hăm tơdrong hơgrop jing mĭnh dêh char, tơring, ƀok Phan Đình Trạc sơkơ̆t hơdăh, tơdrong jang ou ưh khan lăp pơm kơtoei khul kơdră chĕp pơgơ̆r Teh đak, bơ̆ jang jơnei mă oei pơjing jơ ‘năr, jơhngơ̆m pran ‘nao vă pơtrŭt kơtang atŏk tơ iung teh đak.  

Găh dôm tơdrong mă bơngai tăh hla oei ƀơ ƀreh găh tơdrong bơ̆ jang kơ kang ƀô̆ vă trŏ lăp hăm tơdrong ‘meh vă đơ̆ng rŏng hơgrop jing mĭnh, Kơdră chĕp pơgơ̆r Ban Nội chính Phan Đình Trạc tôch hôn bơnê tơdrong tơgop tơpăt đơ̆ng bơngai tăh hla păng ‘nou jing mĭnh lơ̆m dôm tơdrong mă Hơnih tơm Chinh trĭ, Khul kơdră chĕp pơgơ̆r Trung ương Đảng lăng kơjăp păng pơchoh trong. Kiơ̆ trong “Kơdou răh, pơrĕng răh” mă lei trŏ lăp hăm tơdrong pơkăp; pơjao tơdrong jang kơtang, nơ̆r pơma tơngla iung jang hloi, pơ̆n chiu pŭ đơ̆ng bơngai chĕp kơ̆l, hơmet pơ ‘lơ̆ng tơdrong chă tơpŭ dih băl, chă veh ver tơdrong jang. Ƀok Phan Đình Trạc sơkơ̆t hơdăh:“Hơmet lơ loh Trung ương pơjao ăn gơh jang kơtang ăn dêh char păng tơring vă tơring iung jang păng tơring chiu pŭ. Găh dêh char mă kăl bơ̆ jang kiơ̆ trong bơ̆ jang đơ̆ng Trung ương, adoi jing hơnih pơjing ăn trong bơ̆ jang, adoi iung jang pơrô̆ jang, vei lăng đĭ đăng tơring. Găh tơring ‘noh iung jang kiơ̆ trong tơlĕch jang đơ̆ng Trung ương păng dêh char pơtruh ăn păng đei pơjao ăn tơdrong gơh tơchơ̆t, gơ̆h xek tơlang dôm tơdrong hlôi đei pơjao ăn gơ̆h jang kơ tơring. Găh tơdrong jang tơring kăl tơjê̆ hăm kon pơlei, tơklep hăm kon pơlei, xek tơlang tơtom dôm tơdrong mă kon pơlei pơtruh ăn”.

Jơ ‘năr ou, ƀlep lơ̆m năr tơbăt 50 sơnăm Năr Rơngei tơring pơbăh, Teh đak rơngei hkeh kong (30/4), Kơdră chĕp pơgơ̆r Ban Nội chính Trung ương Phan Đình Trạc thay hăm Khul tang măt Kuô̆k hô̆i dêh char Lâm Đồng hlôi pôk ăn 10 tơnô̆ tơmam drăm, mĭnh tơnô̆ kơjă 1 triu hlak jên, ăn rim ŭnh hnam đei iŏk yua ăn teh đak, đei iŏk yua ăn kĕch mang, ƀô̆ đô̆i jĭ rơka tơ̆ tơring Bình Thạnh, apŭng Đức Trọng. Tơmam pôk ăn vă tơtom hơlêm, hôn bơnê, ƀlŏk hơdơ̆r hăm tơdrong tơgop tih tên đơ̆ng rim ƀô̆ đô̆i nuih mơng lôch dŏng teh đak, ƀô̆ đô̆i rơka, ŭnh hnam đei iŏk yua ăn kĕch mang ăn tơdrong hơrih sa phĭ tơtŏ dơnŏ ‘lơ̆ng, hơnŭk hơnoa hrei ou.