Kiơ̆ chih jô̆, dêh char Đắk Lắk dang ei đei 34.434 ŭnh hnam dơnuh hin păng 27.651 ŭnh hnam vă jê̆ dơnuh hin. Lơ̆m kơsô̆ âu, vă jê̆ 5.400 ŭnh hnam dơnuh hin păng vă jê̆ dơnuh hin oei tŏk bŏk hơrih lơ̆m dôm hnam pơm pơgia, hiah hiok. Kiơ̆ tơdrong jang, dêh char Đắk Lắk gô tơgŭm dôm ŭnh hnam âu man hnam oei hăm jên tŏk truh 342,8 ti hlak jên. Lơ̆m noh, 257 ti hlak jên gô đei asong đơ̆ng Tơdrong jang tơgŭm sut hnam pơgia kơ Trung ương păng 85,7 ti hlak jên đơ̆ng jên jang tơring.

Khei ‘năr tơlĕch jang Tơdrong jang pơ tơm blŭng đơ̆ng dang ei truh đĭ khei 10/2025, hăm tơdrong tơm jang đang tơdrong ming man păng pơjao hnam ăn kơ kon pơlei ƀlep khei ‘năr, mă loi ‘noh jĭ lơ̆m ‘măng Hop akŏm Đảng bộ rim tơring. Tơdrong bơ̆jang kiơ̆ Tơdrong jang gô đei dăr hơlen kơjăp, vei sơđơ̆ng tơpăt, rơđăh păng ưh kơ lê̆ đei ƀôh brăh brư dăh mă đei tơdrong kơnê̆.