Pathau mikva saong taong abih gauk! Ngak radaih cứu hỏa, daong ka menuac njauk bala, cap mek kol blah, daong phun jien ka urang kan kathaot, lac dom bruk bo ong Lý Nhơn Thành daok di phường Nguyễn Thái Bình, Quận 1, TPHCM daok ngak dalam luac dom pluh thun tapa. Ong ngak dom bruk ini meng hatai caong lac ba haniem phul, ba siam mekre mai ka urang kan kathaot. Bruk ngak hu makna nan di ong Lý Nhơn Thành hu dom urang vak di rayo sap ndom VN daok di ban raya HCM yaih khan dalam kadha vak hadei ini, da-a mikva saong taong abih gauk tui pang:

  Yaom lac oh kaya meda, min dalam puk paga, langiu jalan mboh urang halei kan kandah atau khin dong hagait, ong Lý Nhơn Thành abih hatai dong brei. Rilo mbang mboh pui khuah ngak khat lihik prong ka bhap bini dalam dom jalan hẻm sit, kayua radeih pandam pui di gah pacang padam khuah chuyên nghiệp kan  tame hu, ong sahaneng lac njauk ngak bruk hagait nan piah dong ka mikva tabiak truh bruk palai pajoa di  “muk pui”. Akaok thun 2018, ong nao mesraiy di gilang pariak 72 triệu đồng piah ngak radeih pandam pui  mini. Sruh radeih di ong oh siam yau radeih pandam pui chuyên nghiệp, min nyu hu ginup chức năng pandam pui song nyu sit, lagaih song labik sit sot tuk nao padam pui khuah dalam hẻm.

 Oh padeih di bruk ngak radeih pandam pui   mini, ong Thành dok kham merat hu mbaok tame padam khuah tuk hu apui khuah dalam labik drei daok. Atah di ni oh lavik, ong hu mbaok daong pandam pui khuah di angaok radeih  buýt, dong ka yaok pluh menuac urang klah di metai. Lac sa tổ trưởng khu phố, ong dok hu mbaok cap mek kol co blah song hatai caong ba mai rai duik siam mekre ka bhap bini. Ngak rilo bruk oh hu angan karei karei, rilo mbang dang anak dom kan kandah, mbuan metai lihik, min tuk mboh dom urang dok jaik drei bui sambai, siam merke, ong Lý Nhơn Thành mboh bingi hatai ye:

 “Hanjuan rup bo bui sambai di abih lac mboh mik va urang kalao, drei bui sambai lô. Gleih glar biak, ia hauk pasah aow biak min tuk mboh mikva klao sambai drei mboh yau drei dok dang di ceik ia patau nyu la-an bingi, hanjuan rup.”

Ong jeng hu caik bruk sangka tal dom urang hu rai duik kan kandah meng bruk patak patom jien duah hu piah duah jalan dong biak biai. Mboh sa urang amaik kan kathaot nduac cagar daluan grauk labik duah jien rong anek bac  đại học, ong duah jien dong muk blei sruh radeih jhul pablei cà phê tapen jalan. Mboh puk paga urang pablei salih ngan song dom pandap panda biak klauk, ong daong ka urang salih bahrau. Dom bruk ngak meng sit tal prong di ong  Lý Nhơn Thành tuk halei jeng hu menuac sia pok meyaom. Ngan song urang, ong lac sa urang cei, sa urang saai abih hatai jai, urang puk paga siam hatai, urang tổ trưởng tuk halei duik rai ka urang karei. Saai Nguyễn Thị Thường, puk paga di ong drut drui lac:

 “Mboh urang pablei pandap langiu jalan di akaok hẻm, cei mboh radeih khut, cei nao blei radeih bahrau mai alin hadiah brei. Ndam metai ye cei buh jien tabiak dong ka urang kan kathaot. Mboh urang metai sang oh hu jien blei hòm ye cei nao likau brei piah blei hu  baoh hòm.”

Kandang kandiah ngak pahla, bruk ong Lý Nhơn Thành taduan hu yaok harei nan lac bruk anit ranam di mik va puk palei, lac angan  "Ong Thành siam hatai" bo rilo urang bhain randap ieu. Dalam dom urang taduan hu bruk sangka nan, hu ong Nghĩa peih radeih cua. Taduan hu bruk dong brei biak rilo, ong Nghĩa mboh suh sah, min tuk biai tabiak ye ong Thành khak oh brei biai. Ong Nghĩa lac, urak ni thau dar phol ye caik dalam hatai saong  kham merat duik rai biak siam piah oh ngak hana tai ong  tổ trưởng siam hatung hatain  Lý Nhơn Thành:

Cei Thành biak siam hatai. Radeih cei Thành jeng brei ka dahlak peih. Dong biak rilomenuac, brei jien bloh dong ka duik cei pablei ia di trạm xe buýt”.

   Jeng daok naong trak angaok bara bruk yau Yuan lac “cơm, áo, gạo, tiền” min tuk tangi sua ka bruk ngak anak tal, ong Lý Nhơn Thành brei thau lac daok patui bruk dong ka urang kan kathaot. Ngan saong ong, nan oh lac trách nhiệm, lac bruk bui sambai bo dok lac jalan diukrai di dunya./.