Ngan saong urang Sán Chỉ ye daoh Soóng Cọ lac sa kadha di bhap bini hu caik veik tapa rilo rairah saong jeng janih oh kurang hu dalam raidiuk. Min ragu daoh ini daok dang anak bruk dak harei dak mbuan si lihik nao. Padang saong cakrok patagok dom kalup kapul daoh Soóng Cọ, abih di nyu lac dalam dom sang bac daok hu huyện Tiên Yên, tỉnh Quảng Ninh sangka, iek praong piah daong khik ramik ilamu nan.

Dalam tukvak tapa, Jabat pato megru huyện Tiên Yên hu tacei pato domsang bac daok di dom bhum ceik, bhum atah bayah, ba dom ragu daoh tame pato dom adei dalam dom sang bac, da-a dom nghệ nhân di palei mai tacei pato dom adei tuk padeih hè, var pataom mbaok kalup kapul jeng hu pato pasram saong padang dom danak dak pataom mbaok tame dom lễ hội di palei, danak dak bruk ngak praong yaok bilan di dom sang bac. Urak ini, hu 2 sang bac di xã bhum glaong Đại Dực saong Đại Thành haong sang bac THPT bangsa gam bac gam daok di pasak huyện padang hu kalup kapul daoh soóng cọ.

Sang bac tiểu học saong THCS Đại Thành hu jaik 95 anek saih daoh tui bac kalup kapul daoh soóng cọ. Tui jalan pato yau sa bruk ngoại khóa siam lagaih kalup kapul dui pachreih hu biak rilo gru pato saong anek saih pataom mbaok tame. Dom adei anek saih tiểu học daok sit thun, sap oh ka dui hu rilo, yau ye daok bac yaok panuac min meng umo 10 thun tagok ye dui sap, pok sap daoh biak gheih. Adei Nình Moóc Cặn, anek saih tal bac 8 – sang bac tiểu học saong THCS Đại Thành tame kalup kapul meng bilan 9 thau daoh biak rilo lagu Soóng Cọ di bangsa drei.

Urak ini, bruk khik ramik lagu daoh Soóng Cọ lac tapa dom kalup kapul dalam sang bac, dalam puk palei. Min dom kadh adaoh hu patoa veik tui cambuai oh ka hu khik veik, oh ka hu mek mepiah ngak tư liệu. Lingiu di nan, dom rai ranaih bangsa Sán Dìu dalam kalup kapul rilo tuk oh thau cambaih sap ndom panuac puac di bangsa drei nan ye bruk bac daoh jeng lac kan kandah praong piah khik veik ragu daoh bhap bini ini. Bruk cakrok dom kalup kapul daoh Soóng cọ dalam sang bac hu daong ka dom adei anek saih hu thau jang ka ragu daoh di bangsa Sán Chỉ. Ini jeng lac sa jalan ngak gheih piah daong khik ramik ilamu bangsa.

Ilamu bnagsa Sán Chỉ dak hu mbak carak jang tapa dom bruk ngak di dom kalup kapul Soóng Cọ dalam sang bac saong dalam puk palei. Ini jeng lac jalan ngak siam piah khik ilamu dom bangsa dalam tỉnh Quảng Ninh jang yau dalam taneh ia./.