Urang bangsa Rơ Măm ieu lac bangsa biak tukik (mala 1.000 urang) pataom gauk daok di palei Le (xa Mô Rai, huyen Sa Thầy, tinh Kon Tum), gah tapen jalan palei haong nagar Campuchia. Mada yaom lac yaom kinh te - xa hoi, raidiuk mikwa daok ralo kan kandah tapi min urang Rơ Măm hu rai diuk ilamu, ralo janih gah. Dalam nan hu daok khik bruk manyim jih dalah, main gong caing haong ralo harei pesta raya.

Dalam dom harei raya praong di urang Rơ Măm pagap ye: palakhah caga, harei klak kubo tanum, harei uon sang rông barau gam haong yang gam haong dom bruk ngak dalam ngak hamu ngak apuh piah peih netang padai brah ieu lac harei praong di abih, hu abih urang dalam palei sa hatai jeng ye kham marat ieik glang, rami ramik ngak harei raya.

Tui urang taha palei angan A Ren, Harei raya peih netang gilang padai atau harei Tet harei nasei bahrau di urang Rơ Măm hu peih ngak yaok thun, tuk masa ngak hamu puh blaoh, nyu bhian tame bilan meng 11-12 saka ia harei. Harei ray aini bhian peih ngak di dalam 3 harei, min tapi abih urang dalam palei njauk caga ieik glang bih sa bilan dalau di nan. Ong taha A Ren Lac: “Urang lakei ye mbeik ciang, pasang capi, tame glai pilih mek phun krei taha abih, tapak jung ngak phun nêu. Kumei taha, dara ye kham marat pasiam khan ao ban barau ka drei kagheih makre ka drei, dalam sang ka harei raya”.

Hadei di dom bruk caga blaoh, urang Rơ Măm peih ngak yang peih bah mbang Gilang netang tangei brah. Camareip di abih, rahra urang ngak yang peih bah mbang netang gialng padai di dalam sang drei, hadei di nan peih tal sang rông piah tame harei raya ka palei. Harei raya hu ngak Giàng,  yang lingik yang po dan haong dom janih ilamu gheih ghang yeu ye: Ngak Kabau, Paoh gong caing, tamia xoang.

Sa-ai A Thái, akakok chi bộ gam haong akaok palei Le brei thau lac: “Peih gilang padai brah oh ieu lac sa janih raya praong di urang bangsa Rơ Măm blaoh nyu daok brei thau sa janih ilamu bangsa. Ini lac ilamu taong yaom glaong brei ka harei ngak blaoh dalam bruk ngak hamu ngak apuh ngak tangei ngak padai, ngak harei raya brei mboh hatai thau dhar phol langik tasik, yang mabang brei ka hangin hajan lagaih, padai brah tangei bei tame sang ralo jeng ye tuk wak masa mikwa urang ngak nong padeih padei main bui sambai mai meng baoh karaoh ngak hu ngak jeng di drei. Harei raya pok praong pok glaong ialmu khang kadang di bhap bini, di dom baoh sang, palei nagar, yak yum jum pataom, anit ranam daong ba gauk”./.