Adat paling Dinh Thầy Thím thun 2024 rah tabiak dalam 3 harei meng 16-18/10 di Inem mek dak rai sajarah ilamo Dinh Thầy Thím, xa Tân Tiến, ban sit La Gi. Adat paling ndung bak ilamo meng kan, tapa nan ngak brei khik ramik saong cak rok patagok khang kajap yaom lingai ilamo bhap bani biak karei di ban sit xa La Gi ndom karei jeng yau di tinh Binh Thuan saong hu jeng pandap panda rivang ma-in pachreih biak rilo bhap bani di puk palei jeng yau tuai damuai atah jaik.   

       Hu mbaok di vaktu peih pakak, amuk Nguyễn Thu Hiền, tuai damuai mai meng Ban raya HCM brei thau, amuk lac urang anek di puk ini, min urak ini daok ngak mbang saong diuk rai dalam Ban raya HCM. Saong thun halei jeng yau nan, tal harei adat paling, baoh sang amuk jeng ba gauk tabiak ini. Mboh puk palei drei dak harei dak salih bahrau, amuk bui hatai.

       "Thun halei anai jeng mai bo dahlau diah nao tame ini gluh bok rilo, daok urak ini mboh laneng lanoi saong hacih sa-at tra. Pak ini drei tame kakuh paling Yang jeng mboh gheih ghang, oh hu kaol kanjah jhak nyu pablak tame nan ye drei mboh uan dalam hatung".

        Meng lavik mai, Adat paling Dinh Thầy Thím hu jeng labik pataom hatai jia di rilo bhap bani. Bruk ngak prong dalam adat paling pak ini lac pataom tame 2 urang sakarrai nan lac Thầy: “Chí Đức Tiên Sinh” saong Thím: “Chí Đức nương nương Tôn Thần,” brei mboh ka hatai pahla anit ranam manuac sia, salut mbut, daong veih manuac urang hu mbang tame dalam glo akaok di bhap bani puk palei.  

Jeng mai meng hatung iek prong pok glaong Thầy Thím piah brei mboh bruk thau dhal phol tal ong akaok ong akei hu pren peih prong bhum taneh ini, mikva puk palei jak gauk padang ngak kalan kakuh di labik Thầy Thím ndih trun dalam glai hango Bàu Cái saong palih ruah harei 15/9 saka aia bulan yaok thun ngak harei adat Tế Thu kakuh paling Po palei. 

      Meng adat paling sit di puk palei hu jeng adat paling prong di labik, meng urang dalam kapul mboh rilo lac urang dalam palei tal dom urang dalam kapul daok dalam saong langiu tinh, meng Dinh Thầy Thím trun pakat tayah tayac biak trak hadei di mesruh metak tal inem mek hu pacang khik biak gheih ghang nan lac sa vaktu atah dua.

        Ong Nguyễn Văn Hai, akaok Mban Khik iek Inem mek dak rai sajarah ilamo Dinh Thầy Thím brei thau, mbaok meta di Dinh Thầy Thím yau harei ini mai meng hu bruk sangka di dom pakat karja jeng yau bruk rik daong di mikva puk palei saong tuai damuai atah jaik.

       
"Njauk hatai di abih nan lac jalan mbak nao mai di ban sit. Karja hu sangka tal inem mek, ngak baoh jalan biak prong laneng lanoi, blaoh mek điện cuac hadah labik inem mek, gam lac bruk pala dua talei phun kayau hijao ka nyu halui mat, ngak brei gheih mekre ka inem mek".

     Tal harei ini, adat paling Dinh Thầy Thím jeng daok hu khik ramik, patui ngak ginup abih ka tukvak, jalan ngak adat cambat tanarakun ngak jeng sa bruk ngak biak sahanak ginreih.

        Langiu di bruk ngak adat meng kan yau adat ngak yang, adat raok khan ao, adat peih pambang kalan, iew lithei, iew ong akaok ong akei saong kakuh paling binh gia… Adat paling Dinh Thầy Thím daok peih ngak dom kadha ma-in bhap bani ndung bak ilamo di urang bhum tasik yau: cakon la-i tabiak taik, njaom pakacah naong ikan, pak hanjuan, katung talei, taong cờ manuac; njaom pakacah cim iew…

        Ong Đinh Văn Linh, daok di khu phố 1, ban sit La Gi, nan lac urang hu labaih 10 thun ma-in cim brei thau, ong biak thau dhal phuan Mban peih ngak lễ hội hu sangka ngak brei mblang ma-in ka dom nghệ nhân ma-in cim chào mào hu taom gaok gauk saong bac megru nao mai haong gauk.

        "Adei sa-ai mai ini thei jeng bui sambai chreih chai brei ka Adat paling Dinh Thầy Thím, caong khin jeng yau gauk, daok giải yau halei ye adei sa-ai nghệ nhân oh iek prong kayua harei ini lac harei rivang ma-in di ban sit". 

        Daok nghe nhan Nguyễn Danh mai meng Ban Phan Thiết khan yau ini:

       "Hu mbaok pak ini dahlak biak bui kayua lac hu mblang ma-in gheih ghang saong rik daong binah sit tame Adat paling Dinh Thầy Thím meng kan mai di ban sit La Gi. Taong abih adei sa-ai caong khin Mban peih bruk thun halei jeng hu peih njaom pakacah ini piah ka adei sa-ai hu taom gaok gauk, bac megru klah raba ilamu haong gauk".

        Adat paling thun ini hu peih ngak njauk tukvak pahadar 27 thun Harei Dinh Thầy Thím hu brei angan Inem mek dak rai sajarah ilamo pakat negar saong 3 thun Adat paling Ilamo – Rivang ma-in Dinh Thầy Thím hu Akaok Mentri Ilamo, Padhih saong Rivang ma-in ba tame talei angan Inem krung ilamo oh mboh di meta pakat negar.  

Adat paling Dinh Thầy Thím nan lac 1 dalam 5 adat paling ilamo siam gheih hu tinh Binh Thuan palih ruah ngak brei cak rok patagok bruk rivang ma-in di puk palei.

        Adat paling Dinh Thầy Thím meng lavik hu mong yau adat paling meng kan biak karei oh lac di bhap bani puk pelei bo daok lac inem krung ilamo di taong abih manuac sia. Adat paling daok lac labik piah pakajap, patagok bruk gul pataom, pambak daong ba gauk dalam bol bhap rahra; paglaong akaok saneng ka halaw gha di bangsa, yaom lingai ka jalan diuk rai, hatai pambuak gauk piah mek pagam dom urang veik dalam bhap bani, dak padang jeng sa jalan diuk rai siam gheih saong hatung hatai mikva dalam palei dak harei dak khang kajap jang./.