Ndom biai bruk meyut meyau, bruk tình dục ka taong abih anek saih pak di mblang bein sang bac atau peih rilo danak yaok bilan piah tacei pato ilamu, pato pakai giới tính ka dom adei lac jalan bo mban giám hiệu sang bac Trung học phổ thông Nguyễn Du di ban raya Hồ Chí Minh hu ngak dalam luac tukvak tapa. Rilo chuyên gia tâm lý hu sang bac da-a mai piah biai brei thau, piah daong dom adei anek saih langyah dom kadha caong thau ka umo bahrau praong atau dom talei rohim pambuak bruk dalam xã hội. Tui ong Huỳnh Thanh Phú, Hiệu trưởng sang bac, bruk giáo dục giới tính, pabak ka anek saih dom ilamu pacang caga xâm hại tình dục njauk ba tabiak khan brei thau cambaih:

 “Dahlak bhian biai haong dom gru pato dalam sang bac lac: rup pabhap di anek saih lac rup pabhap oh taong paoh hu. Kayua yau nan ye, kol drei oh brei gaok tal anek saih, oh ndom puac trak panuac ngak melau mbaok dom adei. Lingiu di nan, kol dahlak mboh lac sang bac njauk peih ngak rilo bruk siam lagaih  daong ka dom adei anek saih mboh hu yaom glaong di rup drei daok pak labik halei”.

    Jeng yau sang bac Trung học phổ thông Nguyễn Du, tukvak jaik di ini, rilo labik pato bac di ban raya Hồ Chí Minh jeng hu sangka jang tal bruk giáo dục giới tính ka dom adei anek saih.  Rilo sang bac tiểu học hu ba tabiak danak dak, padang mblang me-in ngoại khóa piah pablak dom ilamu gah giới tính piah daong ka dom adei anek saih thau khik caga rup drei. Tapa nan, anek saih hu thau jang ka yaom glaong di rup drei, bac hu jalan langayh bruk kan kandah. Chuyên gia tâm lý Lý Thị Mai mboh lac: domkham merat di sang bac dalam bruk pato pakai giới tính jeng yau khik caga uraniah lac bruk brei hu, bruk njauk ngak. Tui tukvak, yaok janih njauk pabak brei dalam jang piah padang hatai jia dalam anek saih, kayua uranaih tok brei thau dom bruk kandauk dalam tuk kol nyu mboh jia hu. Taphia dom danak dak pato pakai, bruk dom sang bac njauk ngak di abih urak ini lac padang kapul urang tư vấn tâm lý piah samar daong ka anek saih. Sang bac jeng njauk pambuak bruk haong amaik ame anek saih piah hu jalan khik caga uranaih siam lagaih jang. Min urang praong jeng jhui huac kanda rilo piah patrun bruk ngak brei uraniah mboh huac. Chuyên gia tâm lý Lý Thị Mai lac:

     “Kol drei jhui huac lô tal labik lac maong halei jeng mboh tội phạm bo njauk thau lac, bruk hagait jeng meda rah tabiak piah paglaong hatai sangka jang. Dom amaik ame jeng jhui tuh abih bruk ka sang bac, bo njauk peih akaok meng sang drei bloh meng tal sang bac, puac di abih lac xã hội.”.

    Jeng hu hatai sahneng yau nan, Luật sư Trần Thị Ngọc Nữ, urang dang akaok Chi hội luật sư di Hội Bảo vệ Quyền trẻ em ban raya Hồ Chí Minh mboh lac: amaik ame hu labik dang biak praong dalambruk khik caga saong pato pakai  uranah plaih njauk xâm hại tình dục. taphia bruk raong pato, uraniah njauk hu caik hatai tui pang piah klah rabha dom sangka dalam raidiuk.  Bruk ini sang bac, xã hội kan ngak hu ka amaik ame di uraniah. Luật sư Trần Thị Ngọc Nữ lac:

 “Amaik ame njauk tui iek anek bhik kayua nan lac bruk di amaik ame. Dalam sang, amaik ame njauk anit ranam, iek glang saong praong di abih lac khik caga anek di drei, tacei pato anek pacang caga xâm hại, thau khik caga rup drei. Dahlau di abih, amaik ame njauk pato ka uraniah thau lac rup drei biak hu yaom glaong, oh thei hu quyền gaok tame. Tuk mboh thei  xâm hại, uraniah njauk khan ka amaik atau ame thau.”.

    Salih ka bruk pacang anek peih praong talei pambuak bruk dalam xã hội, dom chuyên gia kakei dom amaik ame njauk pabak ka anek  dom ilamu gah giới tính, tình dục meng avar. Tuk hu sangka rilo saong hu dalam tangin dom ilamu, dom kỹ năng, tuk nan  uraniah nyu thau  khik caga rup drei  eng saong sami samar jang dalam rai diuk./.